Չի բացառվում՝ մի օր էլ Թուրքիայում Ցեղասպանություն բառի կիրառումը քրեական հետապնդում ենթադրի. թուրքագետ

Թուրքիան մտադիր չէ Հայոց ցեղասպանության հարցում դիրքորոշում փոխել, ընդհակառակը՝ ժխտողականությունը Հայոց ցեղասպանության միջազգային ճանաչման գործընթացի ծավալման հետ դարձել է ավելի ագրեսիվ և հարձակողական: Այս մասին Factor.am-ի հետ զրույցում կարծիք հայտնեց թուրքագետ Հակոբ Չաքրյանը՝ անդրադառնալով Թուրքիայի խորհրդարանի սահմանադրական հանձնաժողովի՝ օրերս վավերացրած նախագծին:

Հիշեցնենք՝ ներքին կանոնակարգ օրենքում կատարված փոփոխության համաձայն՝ Թուրքիայի խորհրդարանում արգելվում է օգտագործել Հայոց ցեղասպանություն, ինչպես նաև Քուրդիստան կամ քրդական շրջաններ արտահայտությունները:

«Որքան Հայոց ցեղասպանությունը ճանաչողների թիվն ավելանում է, այնքան թուրքերն ավելի ագրեսիվ են դառնում՝ զգալով, որ Ցեղասպանության միջազգային ճանաչման գործընթացն անդառնալի է»,- նշեց թուրքագետը՝ այս որոշումը որակելով հետընթաց:

«Էրդողանը մի ժամանակ որոշակի քայլեր կատարում էր, ասում էր՝ հանձնաժողով ստեղծենք, եթե հանձնաժողովը քննարկի և եզրակացնի, որ 1915 թվականի իրադարձությունները Ցեղասպանություն են, ապա մենք կընդունենք, այսինքն՝ մանևրեր էր անում, բայց նախագահ ընտրվելուց հետո Էրդողանի դիրքորոշումը կտրուկ փոխվել է բոլոր առումներով, այդ թվում՝ մարդու իրավունքների, խոսքի ազատության և այլն»,- նկատեց Չաքրյանը:

Բացի այդ, ըստ թուրքագետի՝ եթե խորհրդարանում հնչում է «Հայոց ցեղասպանություն» արտահայտությունը, անկախ նրանից պատգամավորները իշխանամե՞տ են, թե՞ ընդդիմադիր, հասարակության համար այդ տերմինները դառնում է ավելի ընդունելի: Հակոբ Չաքրյանը չի բացառում, որ մի օր էլ Թուրքիայում առհասարակ Ցեղասպանություն բառի կիրառումը քրեական հետապնդում ենթադրի:

«Էրդողանի դիրքորոշումը հայտնի է, նա ընդդիմության հետ լուրջ խնդիրներ ունի և ամեն ինչ անում է՝ իր միանձնյա իշխանությունը օրինականացնելու համար, այն էլ` ապօրինի ձևով: Նա անկանխատեսելի անձավորություն է շատերի համար, այդ թվում՝ եվրոպացի դաշանակիցների, ՆԱՏՕ-ի»,- եզրափակեց մեր զրուցակիցը:

Հիշեցնենք՝ օրինագծին դեմ արտահայտված քեմալական Ժողովրդա-հանրապետական ընդդիմադիր կուսակցության հայազգի պատգամավոր Սելինա Դողանն ընդգծել էր, թե խորհրդարանում փորձ է արվում լռեցնել ազգային փոքրամասնությունների ձայնը:

Շողիկ Գալստյան