Պարապուրդի մատնված ԱԺ-ի պատգամավորները շարունակում են աշխատավարձ ստանալ, երթեւեկել ծառայողական մեքենաներով

Հայաստանի խորհրդարանը 2018-ի դեկտեմբերին ամբողջապես, իսկ 2019-ի հունվարի առաջին կիսամյակում լինելու է պարապուրդի մեջ:

Չնայած դրան, սակայն, Ազգային ժողովի պատգամավորները շարունակում են աշխատավարձ ստանալ:

Factor.am-ի հարցին՝ արդյո՞ք 6-րդ գումարման Ազգային ժողովի պատգամավորները շարունակում են աշխատավարձ ստանալ եւ օգտվել ծառայողական մեքենաներից, խորհրդարանի աշխատակազմի ղեկավարի տեղակալը դրական պատասխան տվեց:

«Ստանում են աշխատավարձ, որովհետեւ նրանք շարունակում են լինել պատգամավոր»,- ասաց Արսեն Բաբայանը:

Դիտարկմանը, որ նրանք օրենքի նախագծեր չեն մշակում, նիստեր տեղի չեն ունենում, որ մասնակցեն, ինչպես նաեւ ընդհանրապես չեն մասնակցում խորհրդարանական աշխատանքներին, Բաբայանն արձագանքեց.«Պատգամավորի գործառույթները չի սահմանափակվում օրենքի նախագիծ գրելով:

Կարող է լինի պատգամավոր, որ երբեւէ օրենքի նախագիծ չգրի, բայց ոչ մեկ իրեն չի ասում, թե ինչու չես գրում: Պատգամավորն ընտրվում է ժողովրդի կողմից եւ միակ դեպքը, որ կարող է աշխատակազմը պատգամավորի աշխատավարձից պահում անել, անհարգելի քվեարկություններին չմասնակցելն է: Եթե չկա քվեարկություն, որին պատգամավորը չի մասնակցել, ուրեմն պետք է վարձատրվի: Անձը պատգամավորի լիազորություններ է իրականացնում»,- ընդգծեց Բաբայանը:

Նշենք, որ Ազգային ժողովի նախագահի աշխատավարձը կազմում է ԱԺ նախագահի աշխատավարձը կազմում է 1 միլիոն 190 հազար դրամ, Ազգային ժողովի նախագահի տեղակալինը՝ 925 հազար դրամ, Ազգային ժողովի մշտական հանձնաժողովի նախագահինը՝ 793 հազար դրամ, նրա տեղակալինը՝ 694 հազար դրամ, իսկ պատգամավորինն էլ 661 հազար դրամ է:

Ստացվում է, որ այս մեկ ու կես ամսվա ընթացքում ԱԺ ղեկավար կազմը եւ պատգամավորները միասին ստանալու են մոտ 6,5 մլն ՀՀ դրամ: Բացի այս, ԱԺ ղեկավար կազմը՝ նախագահը, փոխնախագահները, խմբակցության ղեկավարներն ու հանձնաժողովի նախագահները շարունակելու են օգտվել ծառայողական մեքենաներից: Պատգմավորները պահպանում են նաեւ իրենց անձեռնմխելիությունը: Միաժամանակ տեղեկացնենք, որ խորհրդարանը լուծարումից հետո պահպանում է իր լիազորությունները մինչ նոր խորհրդարանի գումարման առաջին նիստի մեկնարկը:

Factor.am-ն արդեն անդրադարձել է անհարգելի եւ ընդհանրապես ԱԺ նիստերից բացակող պատգամավորներին:

Նշել էինք, որ նիստերից ամենաշատը բացակայել են Գագիկ Ծառուկյանը եւ Կարեն Կարապետյանը:

Հայկ Վարդանյան