10.07.2026 | 02:01
ԱԱ-2026․ Ֆրանսիան դուրս եկավ կիսաեզրափակիչ․ ՏԵՍԱՆՅՈՒԹ
Դատավորի նորամուծությունը խաչ է քաշում արդարադատության վրա. փաստաբան
Հասարակություն
31.07.2017 | 13:58
Փաստաբան Տիգրան Հայրապետյանը լրագրողների հետ հանդիպմանը հղում կատարելով միջազգային, տարածաշրջանային փաստաթղթերին և ներպետական օրենսդրությանը, ՀՀ նախագահի, Մարդու իրավունքների պաշտպանի, քաղաքացիական հասարակության ու միջազգային, տարածաշրջանային կառույցների ուշադրությունը հրավիրեց «Սասնա Ծռերի», Ժիրայր Սեֆիլյանի և մյուսների գործերով տեղի ունեցած համակարգային խախտումների վրա:
Նա մասնավորապես խոսեց դատավոր Տաթևիկ Գրիգորյանի թույլ տված դատական սխալներից՝ նշելով, որ նա արհամարհում և ոտնահարում է օրենքը:
«Նա կոպտորեն ոտնահարում է քրեական դատավարության հիմնարար սկզբունքները: Արդարադատության իրականացման ընթացքում ամենամեծ ձեռքբերումներից մեկը դատավարության մրցակցային սկզբունքն է, մինչդեռ Տաթևիկ Գրիգորյանի նորամուծություններից մեկն այն է, որ դատարանը գործը կարող է քննել առանց պաշտպանի մասնակցության: Իսկ եթե պաշտպանը անգամ ներկա է նիստին, ապա նա չի կարող հայտնել իր կարծիքը քննարկվող հարցի շուրջ կամ իր առարկությունները ներկայացնել նախագահողի գործողությունների դեմ: Սա է պատճառը, որ 8 պաշտպանի նկատմամբ անօրինական սանկցիա է կիրառելուց հետո նրանք այլևս չեն մասնակցում նիստերին»,- հայտարարեց փաստաբանը:
Շարունակելով իր միտքը փաստաբանն ասաց, որ պաշտպանական կողմը պետք է հնարավորություն ունենա իր առարկությունները ներկայացնել, հակառակ դեպքում անիմաստ է խոսել արդարադատության մասին. «Այս պարզ, սակայն միևնույն ժամանակ հիմնավոր հարցը չի հասկանում դատավոր Տաթևիկ Գրիգորյանը: Եվ նրա կողմից կիրառվող նորամուծությունը խաչ է քաշում արդեն 19 տարի ընդունված և կիրառվող արդարադատության վրա»:
Առավել մանրամասն՝ տեսանյութում:
