05.07.2026 | 12:54
Առանձնատանը կից շոգեբաղնիքում հրդեհ է բռնկվել․ դեպքի վայր է մեկնել 3 մարտական հաշվարկ
Մշակույթը չի կարելի բաժանել և տալ ինչ-որ գերատեսչության․ Ռուբեն Բաբայան․ ՏԵՍԱՆՅՈՒԹ
Քաղաքականություն
20.12.2018 | 18:27
Մշակույթը դուրս է եկել հասարակության կրթական համակարգից և դարձել է զուտ զվարճանք կամ միջոցառում. այսօր «Մշակութային ոլորտի խնդիրներն ու ակնկալվող բարեփոխումները. 2018թ. ամփոփում թեմայով» քննարկման ժամանակ ասաց Հովհաննես Թումանյանի անվան պետական տիկնիկային թատրոնի տնօրեն և գեղարվեստական ղեկավար Ռուբեն Բաբայանը։
«Ըստ իս՝ կառուցվածքային փոփոխությունների մասին կարելի է մտածել միայն այն ժամանակ, երբ կոնկրետ որոշվի, թե մշակութային ոլորտն ինչու է պետք, և ինչ է այն իրենից ներկայացնում։ Երբ որոշեն, որ պետք է, կսկսեն մտածել տվյալ ոլորտի կառուցվածքի, մեխանիզմի մասին։ Յուրաքանչյուր բնագավառ` լինի մշակույթի, գիտության, թե տնտեսության, ունի երկու կարևոր խնդիր՝ պահպանել և զարգացնել։ Կան որոշ երկրներ, որտեղ Մշակույթի նախարարությունը միավորված է այլ ոլորտների հետ: Ֆրանսիայում կա Կոմունիկացիաների և Մշակույթի նախարարություն, ինչը ենթադրում է, որ այդ երկու ոլորտները՝ մեկը եկամտաբեր, մյուսը` բյուջե պահանջող, կարողանում են միմյանց լրացնել։ Եթե չեմ սխալվում, մեր երկրում ցանկանում են միավորել սպորտի, մշակույթի և կրթության ոլորտները. երեք ոլորտներն էլ բյուջեից գումար են պահանջում՝ շահութաբեր չեն։ Կարելի է Մշակույթի նախարարություն չունենալ, բայց ունենալ օրենքներ, որոնք թույլ կտան ինքնուրույն զարգանալ»,- ասաց նա՝ անդրադառնալով Մշակույթի նախարարությունը փակելու և նախարարությունները կրճատելու մասին լուրերին։
Ռուբեն Բաբայանը նշեց, որ Եվրոպայում գործում է «մեկնած ձեռքի» սկզբունքը. պետությունը մեկնած ձեռքն է մշակույթին, որից պահանջում է մեկ բան՝ զարգացնել և պահպանել։
«Մշակույթը չի կարելի բաժանել և տալ ինչ-որ գերատեսչության: Մշակույթի պահպանումն ու զարգացումը ոչ միայն պետության, այլև ամբողջ հասարակության գործառույթն է, ինչը շատ կարևոր է։ Երբեք չպետք է ակնկալել, որ մշակույթը կարող է փող բերել»,- ասաց Ռուբեն Բաբայանը։
Մանրամասները՝ տեսանյութում։
