Նիկոլ Փաշինյանի վարչակազմը պետք է պատրաստ լինի առաջիկայում փողոցային պայքարի մարտահրավերին․ Հմայակ Հովհաննիսյան. ՏԵՍԱՆՅՈՒԹ

Factor.am-ի հարցազրույցը Քաղաքագետների միության նախագահ Հմայակ Հովհաննիսյանի հետ

– Պարոն Հովհաննիսյան, արտահերթ խորհրդարանական ընտրությունների արդյունքում ինչպիսի՞ Ազգային ժողով ձևավորվեց:

– Արտահերթ խորհրդարանական ընտրությունները պետք է լուծեին իշխանության ճգնաժամի հաղթահարման խնդիրը: Խորհրդարանական կառավարման համակարգի պայմաններում Հանրապետական կուսակցությունը ԱԺ-ում ուներ մեծամասնություն: Այդ ճգնաժամը հաղթահարվեց,  բայց փոխարինվեց մեկ այլ՝ ընդդիմության ինստիտուտի ճգնաժամով: Սերժ Սարգսյանի համակարգից մնացած գլխավոր՝ կեղծ ընդդիմության արատը պահպանվեց, եթե հաշվի առնենք այն իրողությունը, որ երկրորդ տեղը զբաղեցրեց «Բարգավաճ Հայաստան» կուսակցությունը, որն իր գոյության ընթացքում օգտագործվել է որպես իշխանության ազդեցությունն ընդդիմության վրա տարածելու, այլընտրանքի նպատակով: Մյուս կողմից էլ՝ իմ կողմից հարգված Էդմոն Մարուքյանը որքան էլ ասի, թե իր ղեկավարած «Լուսավոր Հայաստան» կուսակցությունը ստանձնում է ընդդիմության առաքելությունը, այնուամենայնիվ, արժեհամակարգային ընդհանրությունները, որ կային «Ելք» խմբակցության ղեկավար Նիկոլ Փաշինյանի և իրենց միջև, հո չգոլորշիացա՞ն:

– Էդմոն Մարուքյանը հայտարարեց, որ եթե քաղաքականությունը տարանջատված լիներ բիզնեսից, «Լուսավոր Հայաստան» կուսակցությունն ընտրությունների արդյունքում երկրորդ տեղը կզբաղեցներ: Երկրորդ տեղում ԲՀԿ–ն է:

– Եթե ռեյտինգային ընտրակարգը չլիներ, եթե Ընտրական օրենսգրքում հնարավոր լիներ փոփոխություններ անել, եթե ընդունված լիներ Կուսակցությունների մասին նոր օրենքը և հստակ տրվեր կուսակցության իրավաբանական ձևակերպումը, ապա այս արդյունքը չէինք ունենա, ՀՀԿ-ն էլ չէր ստանա 60 հազար ձայն: ՀՀԿ-ն այդ ձայները ստացավ ռեյտինգային ընտրակարգի շնորհիվ, հակառակ պարագայում՝ կստանար զրո ձայն:

– Արտախորհրդարանական ի՞նչ զարգացումներ կարող են լինել խորհրդարանական ընտրություններում պարտված, ինչպես նաև այդ ընտրություններին չմասնակցած ուժերի կողմից:

– ԱԺ-ում ընդդիմության ամլությունը բերելու է նրան, որ այդ բացը փորձ է արվելու լրացնել արտախորհրդարանական ընդդիմության փողոցային պայքարի միջոցով: Դա անխուսափելի է: Նիկոլ Փաշինյանի վարչակազմը պետք է պատրաստ լինի այդ մարտահրավերին: Երբ ԱԺ-ում ընդդիմությունն իր կազմով ի վիճակի չէ ներկայացնել հասարակության բոլոր շերտերին հուզող խնդիրներն ու շահերը, եթե աղճատված է, այդ բացը լրացվում է փողոցի ակտիվացմամբ: Իսկ այս ընտրակարգի պատճառով մեր երկրում հնարավոր չէր անցկացնել նորմալ ընտրություններ: Իհարկե, Նիկոլ Փաշինյանն իր առջև դնում է այդ խնդիրը՝ վերահսկողության տակ պահել ինչպես իշխանությունը, այդպես էլ փողոցը, բայց չեմ կարծում, որ դա նրան կհաջողվի: Եվ նա պետք է հոգեբանորեն պատրաստ լինի այդ մարտահրավերին, որը առաջիկայում, անշուշտ, լինելու է:

Հարցազրույցի մանրամասները՝ տեսանյութում

Արմինե Ավետյան