Ավինյանի նոր աշխատավարձը՝ հին ամսականից ցա՞ծր․ քաղաքապետի վարձատրության հանելուկը

Երևանի քաղաքապետ Տիգրան Ավինյանի աշխատավարձը 2027 թվականին դրույքաչափով կդառնա գրեթե այնքան, որքան նա արդեն իսկ ստացել էր քաղաքապետարանից 2025 թվականին։

Երևանի ավագանին այսօր՝ հոկտեմբերի 13-ին ընդունեց քաղաքապետարանի և վարչական շրջանների աշխատակազմերի պաշտոնյաների, համայնքային ծառայողների և մի շարք այլ աշխատակիցների պաշտոնային ամսական դրույքաչափերը հաստատելու նախագիծը։ 

Ըստ այդմ՝ պաշտոնային ամսական դրույքաչափը հաշվարկվելու է բազային աշխատավարձի և տվյալ պաշտոնի համար սահմանված գործակցի արտադրյալով։ Նախագծով ամենաբարձր՝ 25 գործակիցը սահմանվում է Երևանի քաղաքապետի պաշտոնի համար։ Բազային աշխատավարձի չափը, ըստ քաղաքապետարանի պաշտոնյաների, սահմանվում է յուրաքանչյուր տարվա Երևանի բյուջեով և տատանվում է նվազագույնի 80-ապատիկից մինչև 120-ապատիկ։ Նկատենք, որ ներկայում պետական ծառայողների բազային աշխատավարձը 83 հազար 200 դրամ է։ Թե ինչքան կսահմանվի Երևանի բյուջեում բազային աշխատավարձը, հայտնի կդառնա տարեվերջին, երբ փաստաթուղթն ընդունվի։ Եթե ընդունենք, որ 2027-ին բազային աշխատավարձի չափը չի փոխվելու, ապա Երևանի քաղաքապետի աշխատավարձը կդառնա ամսական 2 մլն 80 հազար դրամ։

Կոռուպցիայի կանխարգելման հանձնաժողով ներկայացված 2025-ի գույքի և եկամուտների հայտարարագրում Ավինյանը քաղաքապետարանից ստացած աշխատանքի վարձատրությունը 2 տողով է ներկայացրել՝ 29,212,204 դրամ և 1,936,152 դրամ։ Վերջինը, հնարավոր է առանձին որևէ ծախսի կամ գործուղումների փոխհատուցումն է։

Դիտարկենք 29,212,204 դրամ գումարը։ Ընդ որում՝ այս գումարը «մաքուրն» է, հարկերը հանված են։

2025-ին Ավինյանի ամսական աշխատավարձը եղել է 1 մլն 320 հազար դրամ, և քանի որ նա պաշտոնավարել է կլոր տարի, ստացվում է տարեկան աշխատավարձի գումարը կազմել է 15 մլն 840 հազար դրամ (1,320*12=15,840)։ Կոպիտ հաշվարկով ստացվում է, որ Տիգրան Ավինյանը 2025-ին ընդհանուր ստացել է մոտ 13․4 մլն դրամ պարգևավճար կամ այլ խրախուսում (ամսական կստացվի՝ (29,212-15,840)/12=1 մլն 114 հազար դրամ)։

Իսկ եթե 29 մլն 212 հազար դրամը բաժանենք 12-ի, ամսական եկամուտը կստացվի 2 մլն 434 հազար դրամ։ Այսինքն՝ միջինում նրա ամսական եկամուտը 2025-ին նույնիսկ ավելին է եղել, քան 2027-ին սպասվող աշխատավարձը։

Նկատենք, որ ավագանու որոշմամբ դրույքաչափերի փոփոխությունը չի չեղարկում պարգևավճարների համակարգը, չնայած պաշտոնյաները վստահեցնում են, թե պլանավորում են պարգևավճարը դարձնել աշխատավարձի մաս։ Այսինքն՝ եթե հաշվարկենք 2025-ի թվերի տրամաբանությամբ, Տիգրան Ավինյանի 2027-ի հայտարարագրում քաղաքապետարանից նրա վարձատրության չափը հնարավոր է արտահայտվի 46 մլն դրամին մոտ թվով։ Սա այն դեպքում, եթե Ավինյանը շարունակի որպես Երևանի քաղաքապետ պաշտոնավարել նաև 2027-ին։

Գայանե Խաչատրյան