03.11.2026 | 23:29
Թրամփը հայտարարել է, որ ԱՄՆ-ը կդադարեցնի Իսրայելին տարեկան 4 միլիարդ դոլարի օգնության տրամադրումը
7.9 մլն դրամ աշխատավարձ, 34 մլն դրամ կանխիկ․ ինչ է հայտարարագրել Արթիկի համայնքապետը
Քաղաքականություն
02.10.2026 | 13:50
Հոկտեմբերի 25-ի ՏԻՄ ընտրություններին Արթիկ համայնքում Քաղաքացիական պայմանագիր» կուսակցության ընտրական ցուցակը գլխավորելու է գործող համայնքապետ Անանիկ Ոսկանյանը։ Factor.am-ը ուսումնասիրել է Ոսկանյանի՝ 2026 թվականին ԿԿՀ ներկայացրած 2025-ի հաշվետու տարվա հայտարարագիրը։
Արթիկի համայնքապետը միանձնյա տիրապետման երկու անշարժ գույք ունի․ 2022-ին գնված բնակարան Երևանում, 2004-ին գնված հողամաս Շիրակի մարզի Պեմզաշեն համայնքում։
Ոսկանյանը 2017 թվականի թողարկման TOYOTA մակնիշի ավտոմեքենա է հայտարարագրել, որը գնել է 2023 թվականին։
Արթիկի համայնքապետարանի աշխատակազմից Ոսկանյանը որպես աշխատավարձ 7 մլն 953 հազար դրամ տարեկան եկամուտ է հայտարարագրել։ Սակայն, ըստ հայտարարագրի, իր տարեկան եկամտից չորս անգամ ավելի կանխիկ գումար ունի. 2025-ին որպես կանխիկ գումար Անանիկ Ոսկանյանը հայտարարագրել է 34 մլն դրամ: Նա նաև 2 մլն դրամ փոխառություն է ստացել։
Ոսկանյանի կինը՝ Էլմիրա Փիլոսյանը ևս միանձնյա երկու անշարժ գույքի է տիրապետում․ 2020 թվականին ձեռք բերված բնակարան Երևանում և 2018-ին ձեռք բերած բնակարան Արթիկում։ Նա Պեմզաշենի միջնակարգ դպրոցից 1 մլն 392 հազար դրամ աշխատավարձ է որպես եկամուտ հայտարարագրել։ Կանխիկ գումարը 2025-ի վերջի դրությամբ 4 մլն դրամ է եղել։
Անանիկ Ոսկանյանի որդին՝ Ռաֆիկ Ոսկանյանն աշխատում է Արթիկի համայնքապետարանում՝ որպես զինվորական հարցերով առաջատար մասնագետ։ Համայնքապետարանից նա որպես աշխատավարձ հայտարարագրել է 2 մլն 365 հազար դրամ։ Որպես տրանսպորտային միջոց համայնքապետի որդին 2008 թվականի թողարման Ford մակնիշի մեքենա է հայտարագրել։ Ոսկանյանը նաև 4 մլն դրամ կանխիկ գումար է հայտարարագրել։
Արթիկ համայնքի ղեկավար Անանիկ Ոսկանյանը 2021 թվականի դեկտեմբերի 5-ի Արթիկի ՏԻՄ ընտրություններում ևս «Քաղաքացիական պայմանագիր» կուսակցության ցուցակն էր գլխավորում։ ՔՊ-ն և «Ազատական» կուսակցությունը ընտրություններից հետո համագործակցության հուշագիր են ստորագրել՝ Ոսկանյանին առաջադրելով համայնքի ղեկավարի միասնական թեկնածու։ 2021 թ. դեկտեմբերի 23-ին տեղի է ունեցել նրա երդմնակալությունը՝ որպես Արթիկ խոշորացված համայնքի ղեկավար։ 2026 թվականի օգոստոսին Անանիկ Ոսկանյանն ընտրվել է ՔՊ Արթիկի տարածքային խորհրդի կազմում։
Արթիկում ՏԻՄ ընտրություններին առաջադրվել է ևս երեք կուսակցություն՝ «Ազատ դեմոկրատներ», «Ապրելու երկիր» և «Հայրենիք» կուսակցությունները։
Անի Թամրազյան
