02.10.2026 | 12:32
Ռուսաստանը չորրորդ անգամ հարվածել է Կիևի Հարավային կամրջին. երթևեկությունը դադարեցվել է
Ուկրաինական ԱԹՍ-ների հարվածների հետևանքով Սամարայում ու Վոլգոգրադում նավթավերամշակման գործարան ու պահեստային համալիր են հրդեհվել
Քաղաքականություն
02.10.2026 | 12:03
Ուկրաինական անօդաչու թռչող սարքերը հոկտեմբերի լույս 2-ի գիշերը հարվածներ են հասցրել Վոլգոգրադին և Սամարային։ Վոլգոգրադի մարզի նահանգապետ Անդրեյ Բոչարովը հայտնել է «արդյունաբերական ենթակառուցվածքի դեմ ԱԹՍ-ների զանգվածային հարձակման» մասին՝ չմանրամասնելով, թե որ ձեռնարկություններն են եղել թիրախում։ Նահանգապետի խոսքով՝ հրդեհ է բռնկվել բնակելի շենքում, մեկ մարդ տուժել է, գրում է Meduza-ն։
Միաժամանակ, ականատեսները լուսանկարներ և տեսանյութեր են հրապարակել այն տարածքում բռնկված ուժեղ հրդեհից, որտեղ գտնվում են Վոլգոգրադի նավթավերամշակման գործարանը և «Կաուստիկ» քիմիական ձեռնարկությունը, գրում է Astra-ն։ Վոլգոգրադի նավթավերամշակման գործարանը նախկինում ևս մի քանի անգամ ենթարկվել է ուկրաինական անօդաչուների հարձակմանը։ Լրատվամիջոցը նաև ուշադրություն է հրավիրում քաղաքի բնակիչների պնդումներին, որ Վոլգոգրադում ԱԹՍ-ների վտանգի մասին նախազգուշացում չի հայտարարվել։
Սամարայում, Astra-ի տվյալներով, հրդեհ է բռնկվել գծային արտադրական-դիսպետչերական կայանում (ЛПДС)։ «Սամարա» ЛПДС-ն Եվրոպայի ամենամեծ նավթապահեստարանային պարկն է և «Տրանսնեֆտ» համակարգի մի մասն է։ Դրան են միանում Արևմտյան Սիբիրից, Թաթարստանից, Օրենբուրգի մարզից և Ղազախստանից նավթ տեղափոխող չորս խողովակաշարեր։
Սամարա քաղաքի և մարզի իշխանությունները պաշտոնապես հրդեհի մասին չեն հայտնել։ Սակայն քաղաքում հայտարարվել է հրթիռային և անօդաչու թռչող սարքերի վտանգ, հասարակական տրանսպորտը չի աշխատել, իսկ մետրոն գործել է որպես ապաստարան, հայտնել էր Սամարայի քաղաքապետ Իվան Նոսկովը։
ՌԴ Պաշտպանության նախարարության հայտարարության համաձայն՝ նախօրեին ժամը 20:00-ից մինչև առավոտյան ժամը 08:00-ն ՀՕՊ ուժերը Ռուսաստանի 13 շրջանների, բռնակցված Ղրիմի, ինչպես նաև Սև ու Ազովի ծովերի տարածքում «որսացել և ոչնչացրել են» ուկրաինական 646 անօդաչու թռչող սարք։
Թարգմանությունը՝ Էմմա Չոբանյանի
