Թրամփը հայտարարել է, թե Flydubai-ի ինքնաթիռը կործանումից փրկել է իսրայելցի սանտեխնիկը

ԱՄՆ նախագահ Դոնալդ Թրամփը Սպիտակ տանը լրագրողների հետ զրույցում պնդել է, որ Flydubai-ի ինքնաթիռի կործանումը կանխել է իսրայելցի սանտեխնիկը։ Թրամփի խոսքով՝ այդ ուղևորը օդաչուների խցիկից աղմուկ է լսել, մտել է խցիկ և դուրս բերել երկրորդ օդաչուին, որը հարձակվել էր օդանավի հրամանատարի վրա, փոխանցում է Meduza-ն։

Թրամփը պատմել է, թե ուղևորը կարողացել է ուղղել վար սլացող օդանավի ընթացքը՝ հիշելով օդաչուության հիմունքները մի հեռուստահաղորդումից, որը նվիրված է եղել ավիաղետների հետաքննությանը։ Ավելի ուշ ինքնաթիռի կառավարումը ստանձնել են հերթափոխային անձնակազմի օդաչուները, որոնք նույնպես այդ չվերթով էին մեկնում։

ԱՄՆ նախագահն ասել է, որ այս «անհավանական պատմությունն» իրեն պատմել է Իսրայելի վարչապետ Բենիամին Նեթանյահուն։

Այն բանից հետո, երբ Flydubai-ի ինքնաթիռով թռչող իսրայելցիներին հատուկ չվերթով տեղափոխել են Թել Ավիվ, Նեթանյահուն հանդիպել է ուղևոր Յանիվ Խայունի հետ։ Արյունոտ հագուստով այդ ուղևորի լուսանկարները հրապարակվել էին աշխարհի տարբեր լրատվամիջոցներում։ Խայունն Իսրայելի վարչապետին պատմել է, որ ինքն է քաշել ինքնաթիռի ղեկը, ինչից հետո օդանավը սկսել է ուղղվել։ Նեթանյահուն նրան հերոս է անվանել։

Սեպտեմբերի 30-ի առավոտյան Դուբայից Թել Ավիվ թռչող Flydubai ինքնաթիռն արտակարգ ազդանշան էր տվել և վթարային վայրէջք կատարել Սաուդյան Արաբիայի Թաբուք քաղաքի օդանավակայանում։

Հաղորդվում էր, որ թռիչքի ընթացքում երկրորդ օդաչուն վիրավորել է օդանավի հրամանատարին՝ կառավարումը իր ձեռքը վերցնելու և ինքնաթիռը կործանելու նպատակով։ Սակայն մի քանի ուղևորների հաջողվել է վնասազերծել հարձակվողին, իսկ Flydubai-ի ևս երկու օդաչու, որոնք աշխատանքային գրաֆիկի շրջանակում ուղևորների սրահում են եղել, կարողացել են վայրէջքի տանել ինքնաթիռը։

Flydubai-ը մինչև միջադեպի հանգամանքների պարզաբանումը դադարեցրել է թռիչքները դեպի Իսրայել։ Իսրայելի պաշտպանության նախարարը միջադեպն անվանել է «ջիհադիստական ահաբեկչության փորձ»։

Թարգմանությունը՝ Էմմա Չոբանյանի