Գերմանիայում էլեկտրակայանի կարճ միացումը դիտարկվում է որպես կանխամտածված հարձակում

Գերմանիայի արևմտյան Հյուսիսային Հռենոս-Վեսթֆալիա դաշնային երկրամասում՝ Քյոլնից ոչ հեռու գտնվող Բերգհայմ քաղաքի էլեկտրակայանում տեղի ունեցած կարճ միացումը ոչ թե տեխնիկական անսարքության, այլ կանխամտածված հանցավոր գործողությունների հետևանք է եղել։ Այս մասին  հայտնել է Գերմանիայի ոստիկանությունը, գրում է  DW-ն։

Միջադեպը տեղի է ունեցել նախորդ երեկոյան։ «Ներկայում առկա տեղեկությունների համաձայն՝ մենք ելնում ենք այն հանգամանքից, որ սա ոչ թե տեխնիկական անսարքություն է եղել, այլ կանխամտածված հանցագործություն», – ոստիկանության մամուլի ծառայությանը հղումով հայտնում է Reuters գործակալությունը։ Նշվում է, որ հարակից քաղաքներում և գյուղերում ընկերության հաճախորդները էլեկտրաէներգիայի անջատումների չեն բախվել։

Բերգհայմում ենթակայանի վթարից հետո RWE-ի ածխային էլեկտրակայանների հինգ բլոկներ անջատվել են ցանցից, հայտնել է RWE Power դուստր ձեռնարկությունը։

Ըստ օպերատորի՝ միջադեպը ազդել է Բերգհայմի Նիդերաուսեմի էլեկտրակայանի երեք բլոկների և Գրևենբրոյխի Նոյրաթի էլեկտրակայանի երկու բլոկների վրա։ Դրանց համակցված հզորությունը կազմում է մոտավորապես 4200 մեգավատ։ Միջադեպի պահին օբյեկտները ցանցին մատակարարում էին մոտավորապես 3000 մեգավատ էլեկտրաէներգիա։

Չնայած էներգաբլոկների  անջատմանը, էլեկտրաէներգիայի անջատումներ չեն եղել:

RWE-ն հայտնել է, որ անջատված բլոկներից մեկն արդեն վերամիացվել է ցանցին, և սպասվում է, որ ևս երկուսը կվերականգնվեն այսօր ավելի ուշ: Մնացած էներգաբլոկների  վերագործարկման աշխատանքները շարունակվում են։ Ոստիկանությունն այժմ աշխատում է հանցագործության հնարավոր հետքերը պարզելու ուղղությամբ: Ոստիկանության խոսնակը չի մանրամասնել հանցագործների հնարավոր գործողությունների եղանակը:

Բերգհայմի ենթակայանում տեղի ունեցած միջադեպի մասին առաջինը հայտնել է WDR մեդիաընկերությունը։ Նշվում է, որ ոստիկանության կարծիքով, դեռ վաղ է եզրակացություններ անել այս միջադեպի և սեպտեմբերի 1-ին հայտնի դարձած Բրանդենբուրգում էլեկտրակայանի դիվերսիայի միջև հնարավոր կապի վերաբերյալ։

Բրանդենբուրգում անհայտ անձինք փորձել են հարձակվել Շպրեե-Նայսե շրջանի Տուրնով-Պրայլակ էլեկտրակայանի վրա։ Այն տարածաշրջանի կարևորագույն բարձրավոլտային հանգույցներից մեկն է, որը երկրամասի խոշորագույն՝ Յենշվալդե (Jänschwalde) էլեկտրակայանը միացնում է 50 հց հաճախականությամբ էլեկտրահաղորդման ցանցին։

Դրա հետևանքով տեղի է ունեցել երկու կարճ միացում, և Յենշվալդեի էլեկտրակայանի «Բ» էներգաբլոկը ժամանակավորապես անջատվել է։ Սակայն էլեկտրաէներգիայի զանգվածային անջատումից հաջողվել է խուսափել։ Բրանդենբուրգի ներքին գործերի նախարար Յան Ռեդմանը հայտարարել էր, որ այս դաշնային երկրամասի էլեկտրացանցը դիվերսիայի թիրախ է դարձել։

Թարգմանությունը՝ Էմմա  Չոբանյանի