02.11.2026 | 22:55
«Ադրբեջանում խոսքի ազատությունն ու անկախ քաղաքական գործունեությունը ճնշվում են». ԵԽԽՎ և ԵԱՀԿ ԽՎ ներկայացուցիչներ
Մտածում եք, որ հանցագործ թիմակից կարող ենք ունենալ ու թիմով պաշտպանե՞նք․ Հասմիկ Հակոբյան. ՏԵՍԱՆՅՈՒԹ
Քաղաքականություն
25.08.2026 | 18:42
ԱԺ ՔՊ խմբակցության պատգամավոր Հասմիկ Հակոբյանը, անդրադառնալով Լևոն Քոչարյանի բնակարանում և նրանց ընտանիքին պատկանող այլ հասցեներում իրականացված խուզարկություններին ասաց, որ գործընթացը երկար ժամանակ իրականացված աշխատանքի արդյունք է։
Նրա խոսքով՝ Հակակոռուպցիոն կոմիտեի կողմից հրապարակված նյութերում հիշատակվող հողամասերի, շենքերի և այլ գույքերի վերաբերյալ աշխատանքը 13 ժամում չէր կարող իրականացվել։
«Դա տևական ժամանակ իրականացված աշխատանք էր»,- նշեց Հակոբյանը՝ միաժամանակ ընդունելով, որ հասարակությունը կարող է հարց բարձրացնել, թե ինչու գործընթացը ակտիվացավ հենց վարչապետի հայտարարությունից հետո։
Խուզարկության թույլտվության ժամկետների վերաբերյալ Հակոբյանը նշեց, որ չի տիրապետում այն տեղեկությանը, թե իրավապահները երբ են դիմել դատարան և երբ են ստացել թույլտվությունը։
Պատգամավորը Փաշինյանի՝ իրավապահներին տրված հրահանգի մասին հայտարարությունը ներկայացրեց որպես քաղաքացիներին տված խոստման իրականացում՝ նշելով, որ խոսքը, իր ձևակերպմամբ, «գողոնը» պետությանը, համայնքին և քաղաքացիներին վերադարձնելու մասին է։
Անդրադառնալով ՔՊ թիմում այլ գործարարների վերաբերյալ հրապարակումներին՝ Հակոբյանը նշեց, որ եթե իր թիմակիցներից որևէ մեկը հանցագործություն է կատարել, պետք է այդ մասին հաղորդում ներկայացվի իրավապահներին։
«Ինչո՞ւ եք մտածում, որ կարող է ինչ-որ հանցագործ լինել մեր թիմակիցը ու մենք թիմով պաշտպանենք։ Այդպիսի բան անհնար է»,- հայտարարեց նա։
Հիշեցնենք, որ այսօր առավոտյան իրավապահները խուզարկել են ԱԺ Հայաստան խմբակցության պատգամավոր Լևոն Քոչարյանի բնակարանը և նրանց ընտանիքին պատկանող ընկերությունները: Սա տեղի էր ունեցել երեկ խորհրդարանում Լևոն Քոչարյանի և Նիկոլ Փաշինյանի միջև ծավալված սուր բանավեճից հետո։
Մանրամասները՝ տեսանյութում։
Արփի Հակոբյան
