16.09.2026 | 10:32
Սան Պաուլո. Էլինա Ավանեսյանը հաղթել է և կարող է մրցել Ալինա Չարաևայի հետ
Պետք է վերջնական որոշենք՝ ում հետ և ինչ ատոմային կայան ենք կառուցելու․ Փաշինյան․ ՏԵՍԱՆՅՈՒԹ
Տնտեսություն
24.08.2026 | 12:28
Հայաստանը որդեգրում է էներգետիկ լիարժեք անկախության հասնելու ռազմավարություն, իսկ առաջիկա մեկ տարվա ընթացքում երկիրը պետք է վերջնական որոշում կայացնի նոր ատոմակայանի կառուցման շուրջ։ Այս մասին Ազգային ժողովի ամբիոնից հայտարարեց վարչապետ Նիկոլ Փաշինյանը։
«Ուզում եմ շատ հստակ հայտարարել, որ Հայաստանը որդեգրում է էներգետիկ անկախություն ունենալու ռազմավարություն։ Սխալ չլսեցիք՝ էներգետիկ անկախություն ունենալու ռազմավարություն, և սա առավել քան իրատեսական է՝ պայմանավորված վերականգնվող, մասնավորապես՝ արևային էներգետիկայի զարգացմամբ»,- նշեց վարչապետը՝ հավելելով, որ 2018 թվականի 16 մեգավատի համեմատ այսօր արևային կայանների հզորությունը հասել է 1213 մեգավատի։
Փաշինյանը հայտնեց, որ մինչև 2031 թվականը նախատեսվում է ունենալ առնվազն 800 մեգավատ հզորությամբ էլեկտրաէներգիայի կուտակիչ կայաններ, որոնք կկուտակեն ցերեկային արևային էներգիան՝ գիշերը ցանցին մատակարարելու համար։ Անդրադառնալով միջուկային էներգետիկայի ապագային՝ վարչապետն ընդգծեց․
«Առաջիկա մեկ տարվա ընթացքում մենք պետք է վերջնականապես կողմնորոշվենք, թե ում հետ և ինչ ատոմային կայան ենք կառուցելու, որովհետև, ինչպես գիտեք, 2036 թվականին գործող ատոմակայանի ռեսուրսը սպառվում է։ Ի դեպ, ատոմակայանի փակումը որպես դե յուրե պարտավորություն՝ Հայաստանը ստանձնել է դեռևս 2017 թվականին՝ նախորդ իշխանության օրոք»։
Միաժամանակ նա հայտնեց, որ քննարկվում է նաև գործող ՀԱԷԿ-ի շահագործման ժամկետը 2036-ից հետո ևս մեկ անգամ երկարաձգելու հնարավորությունը։
«Զարգացող տեխնոլոգիաները հնարավոր է թույլ տան 2036-ից հետո ևս մեկ անգամ երկարացնել ՀԱԷԿ-ի շահագործման ժամկետը, և մենք այս մասին քննարկումներ ենք վարում արդեն բավական ժամանակ հնարավոր գործընկերների հետ։ Նման որոշում կկայացվի միայն միջազգային իրավասու կառույցների հետ սերտ գործակցությամբ»,- ընդգծեց վարչապետը։
Մանրմասները՝ տեսանյութում։
Անի Թամրազյան
