Արդվի գյուղի բնակիչները թույլ չեն տալիս ՀՀԿ-ական պատգամավորին պատկանող ոսկու հանքի շահագործումը

Լոռու մարզի Արդվի գյուղի բնակիչները փակել են գյուղ տանող ճանապարհը՝ թույլ չտալով այնտեղ շահագործվող ոսկու հանքի երկրաբանական ուսումնասիրություն իրականացնող ընկերության ներկայացուցիչների մուտքը։

ԱԺ «Ելք» խմբակցության քարտուղար Գևորգ Գորգիսյանը Factor.am-ի հետ զրույցում դեպքի վայրից որոշ մանրամասներ հաղորդեց․ «Արդվի գյուղը, որը հայտնի է պատմամշակութային արժեքներով, դեռևս հեթանոսական ժամանակաշրջանից մնացած գերեզմաններով, 7-րդ դարի եկեղեցով, պատմական արժեք է։ Այս գյուղում էն նկարահանվել «Նռան գույնը» ֆիլմը, «Մենք ենք, մեր սարերը» ֆիլմից դրվագ, ու հիմա այդ պատմական եկեղեցուց 500 մետր հեռավորությամբ սարի գլխին հանք են ուզում բացել։ Հանք բացելու մասին տեղեկությունը գյուղացիներն իմացել են բնապահպանության նախարարության կայքից»։

Գորգիսյանի խոսքով՝ այդ տարածքում գյուղի հիմնական արոտավայրերն են և այն տարածքը, որով խմելու ջրի հարցն է կարգավորվում: «Պատմամշակութային հարստությունն ավիրվում է, ավիրվում է նաև գյուղը, որովհետև այլևս ջուր չի լինում խմելու, բացի այդ՝ մարդկանց հիմնական ապրուստը անասնապահությունն է, իսկ այդ հանքը գալիս գրավում է արոտավայրերի մեծ մասը»,- ասաց պատգամավորը՝ շարունակելով.«Գյուղացիներն ասում են չենք թողնելու մտնեն գյուղ, սա մեր գյուղն է, չենք սակարկելու»:

Ի դեպ, պատգամավորը նաև ուշադրություն հրավիրեց «Հետք» պարբերականի այն հրապարակման վրա, որ հանքի շահագործմամբ զբաղվող ընկերությունը, կարծես թե, պատկանում է ՀՀԿ-ական պատգամավոր Վահրամ Բաղդասարյանին, նաև հավելեց, որ պատգամավորը ևս այսօր եկել էր գյուղ. «Շատ տարօրինակ է, որ նա եկել էր այստեղ Գազպրոմի և ՌԴ դեսպանատան մեքենաներով»։

Ըստ «Հետքի» հրապարակման՝ «Միռամ» ՍՊԸ-ն գրանցվել է այս տարվա մայիսի 10-ին: Ընկերության ամենամեծ բաժնետերը Արայիկ Սամվելի Զադոյանն է: Նա ՀՀԿ խմբակցության ղեկավար Վահրամ Բաղդասարյանին պատկանող «Վաբա» ՍՊԸ-ի տնօրենն է: Վահրամ Բաղդասարյանի հետ կապ հաստատել չհաջողվեց, իսկ Արդվիի գյուղապետ Սամվել Կիրակոսյանը «խնդրեց չզանգել իրեն, քանի որ տեղում չէ և ծանոթ չէ իրավիճակին»։

Սեդա Ղուկասյան