Ադրբեջանական բեռնատարների վարորդները Վրաստանում շաբաթներով չեն անցնում մաքսային ստուգումը․ Բաքուն դիմել է Վրաստանի ԱԳՆ-ին

Վրաստանի տարածքով տարանցիկ երթևեկող ադրբեջանական բեռնատարների մի խումբ վարորդներ արդեն մի քանի շաբաթ է՝ չեն կարողանում անցնել մաքսային ձևակերպման գործընթացը։ Վարորդների խոսքով՝ մաքսային անցակետերում ուշացումների պատճառների վերաբերյալ իրենց որևէ պաշտոնական պարզաբանում չի տրամադրվում։ Իր հերթին, Վրաստանում Ադրբեջանի դեսպանությունը պարզաբանում ստանալու նպատակով հարցում է ուղարկել վրացական կողմին։

Ադրբեջանական Report-ի հաղորդմամբ՝ վարորդները երկար ժամանակ սպասում են հարցի լուծմանը «Սարփ» և «Կարմիր կամուրջ» սահմանային անցակետերում, ինչպես նաև Թբիլիսիի Մաքսային ձևակերպումների կենտրոնում։

Վարորդներից Թեյմուր Սուլթանովն ասել է, որ Բաթումի ուղևորությունն անցել է առանց որևէ խնդրի։ Սակայն Սարփի անցակետում նրա մեքենան կանգնեցրել են, անձնագիրը, վարորդական իրավունքը և այլ փաստաթղթեր՝ առգրավել։

«Ես արդեն 15 օր է՝ մաքսային տարածքում եմ։ Մեզ միայն ասում են՝ «Սպասե՛ք»։ Երբ հարցնում եմ՝ ինչո՞ւ, չեն պատասխանում։ Ոչ ոք չի բացատրում, թե ինչ խնդիր կա՝ փաստաթղթերը, բեռը, թե՞ քաշը»,- ասել է վարորդը։

Վարորդների խոսքով՝ Կարմիր կամրջի սահմանային անցակետում նույնպես կանգնեցվել են ադրբեջանական համարանիշներով մի քանի բեռնատարներ։ Նրանք իմացել են, որ մաքսային աշխատակիցները հետագայում հատուկ թույլտվություն են պահանջել Վրաստանի Շրջակա միջավայրի պաշտպանության և գյուղատնտեսության նախարարությունից։ Վարորդները պնդում են, որ իրենց տրամադրվել է այդ փաստաթուղթը, սակայն հետո խնդրել են այն թարգմանել վրացերեն։

Վարորդներն ասում են, որ իրենց պետք է հստակ բացատրություն տրվի ձգձգման պատճառների մասին, թե ինչ փաստաթղթեր կամ ընթացակարգեր են պահանջվում խնդիրը շտկելու համար:

Վրաստանում Ադրբեջանի դեսպանատնից Report-ին հայտնել են, որ իրավիճակը վերահսկողության տակ է։ Դիվանագիտական ​​ներկայացուցչությունում նշել են, որ հարցում են ուղարկել Վրաստանի ԱԳՆ, հարցն ուսումնասիրվում է լիազորված պետական ​​մարմինների հետ համատեղ։

Վրաստանի Եկամուտների ծառայությունը մեկնաբանել է ադրբեջանական լրատվամիջոցների կողմից տարածված տեղեկությունները, որ ադրբեջանական համարանիշներով բեռնատարների վարորդները չեն կարողանում հատել վրացական մաքսային անցակետերը։ Ծառայությունը հայտնել է, որ «բեռների տեղաշարժը բոլոր ուղղություններով անցակետերով ընթանում է անարգել», և որ «տվյալ դեպքը քննվում է»։

Թարգմանությունը՝ Էմմա Չոբանյանի