Հայաստանում առաջին անգամ մեկնարկել է Cisco Networking Academy Camp Armenia 2026 ամառային կրթական ճամբարը

Ինժեներական քաղաքում օգոստոսի 4-ին տեղի է ունեցել Cisco Networking Academy Camp Armenia 2026 ամառային կրթական ճամբարի բացման միջոցառումը։ Այս մասին տեղեկացնում են ՀՀ բարձր տեխնոլոգիական արդյունաբերության նախարարությունից:

Ծրագիրն իրականացվում է ՀՀ բարձր տեխնոլոգիական արդյունաբերության նախարարության, Cisco Networking Academy-ի և «Թվային տնտեսության ինստիտուտ» հիմնադրամի համագործակցությամբ։ Այն Հայաստանում անցկացվում է առաջին անգամ և միտված է երիտասարդների թվային և տեխնոլոգիական հմտությունների զարգացմանը՝ միջազգային կրթական հնարավորություններն ավելի լայն շրջանակի հասանելի դարձնելու նպատակով։

Միջոցառմանը բացման խոսքով հանդես է եկել ՀՀ բարձր տեխնոլոգիական արդյունաբերության նախարարության тեխնոլոգիական էկոհամակարգի զարգացման վարչության պետ Հայկ Ենգիբարյանը։ Նա կարևորել է Cisco-ի հետ համագործակցությունը՝ ընդգծելով, որ նախորդ տարի ստորագրված համագործակցության հուշագրով նախատեսված նախաձեռնություններն ամբողջ ծավալով առաջ են ընթանում և նպաստում են Հայաստանում տեխնոլոգիական կրթության զարգացմանը։

Ողջույնի խոսքով հանդես է եկել նաև Hardware Engineering (Cisco Systems) տնօրեն Արսեն Մանուկյանը, որը վերահաստատել է Cisco-ի պատրաստակամությունը շարունակելու աջակցությունը նման նախաձեռնություններին՝ կարևորելով դրանց դերը թվային հմտությունների զարգացման, երիտասարդների կրթության և միջազգային կրթական հնարավորությունների հասանելիության ընդլայնման գործում։

Բացման միջոցառման շրջանակում անցկացվել են թեմատիկ վարպետության դասեր, որոնց ընթացքում մասնակիցները ծանոթացել են ժամանակակից տեխնոլոգիական միտումներին, մասնագիտական զարգացման հնարավորություններին և արհեստական բանականության դարաշրջանում պահանջված հմտություններին։

Միջոցառման ավարտին ներկայացվել են ծրագրի հաջորդ փուլերը և երեքշաբաթյա կրթական ճամբարի կազմակերպչական մանրամասները։

Cisco Networking Academy Camp Armenia 2026-ի շրջանակում մասնակիցները հնարավորություն կունենան անվճար մասնակցելու հետևյալ դասընթացներին՝

Թվային գրագիտություն (Digital Awareness)

Կիբեռանվտանգության ներածություն (Introduction to Cybersecurity)

Հետաքննության արվեստ (The Art of Investigation)

Ժամանակակից արհեստական բանականության ներածություն (Introduction to Modern AI)

Մրցունակ ինքնակենսագրականի կազմում՝ արհեստական բանականության գործիքների կիրառմամբ (Update Your Resume with AI)

Ճամբարին մասնակցելու համար անհրաժեշտ է լրացնել գրանցման հայտը։ Ծրագրի բոլոր հայտարարությունները, դասերի հղումները և կազմակերպչական տեղեկությունները կհրապարակվեն ճամբարի պաշտոնական Telegram խմբում։

Գրանցման հայտ՝
https://forms.gle/bXJennWeNuNsnaPr9

Պաշտոնական Telegram խումբ՝
https://t.me/+ChdHiUGr5qsxY2Qy