«Հիվանդանոցում եմ, ինձ լավ չեմ զգում»․ Հայկ Կոնջորյանի եղբայրը ծեծի է ենթարկվել

Աժ «Քաղաքացիական պայմանագիր» խմբակցության ղեկավար Հայկ Կոնջորյանի եղբայրը՝ Ավետ Կոնջորյանը, օրեր առաջ ծեծի է ենթարկվել։

«Հիվանդանոցում եմ, ինձ լավ չեմ զգում»,- Factor TV-ին ի ասաց քաղաքական գործչի եղբայրը և անջատեց հեռախոսը։

Ներքին գործերի նախարարությունից մեզ փոխանցեցին, որ հուլիսի 25-ին՝ ժամը 14։00-ի սահմաններում, դեպքի վերաբերյալ հաղորդում է ստացվել։

«Ձեռնարկված անհետաձգելի և ծավալուն գործողությունների արդյունքում մեկ անձ ձերբակալվել է»,- նշեց ՀՀ ՆԳՆ ՀՀԻՎ պետի տեղակալ Էրիկ Աստվածատրյանը։

Քննչական կոմիտեից էլ Factor TV-ին հայտնեցին, որ դեպքի առթիվ ՀՀ քննչական կոմիտեի Կոտայքի մարզային քննչական վարչությունում նախաձեռնվել է քրեական վարույթ՝ մի խումբ անձանց կողմից ֆիզիկական ներգործության և խուլիգանության հատկանիշներով:

«Մեկ անձ ձերբակալվել է: Քրեական վարույթի նախաքննությունը շարունակվում է՝ միջադեպի մյուս մասնակիցներին հայտնաբերելու ուղղությամբ»,- ասաց ՔԿ մամուլի քարտուղար Կիմա Ավդալյանը:

Այսօր առավոտյան միջադեպից տեսանյութ և որոշ մանրամասներ էր հրապարակել լրագրող Գայանե Զարգարյանը՝ նշելով, որ Կոնջորյանը ծեծի է ենթարկվել հուլիսի 24-ին ժամը 00:05-ի սահմաններում Աբովյան քաղաքում իր շքամուտքի առաջ։ Ըստ լրագրողի՝ իր տեղեկություններով, ծեծի ենթարկողները կառուցապատման աշխատանքներով զբաղվող, Կոտայքի մարզում գրանցված «Միլլոն Մայնինգ» ընկերության տնօրեն Բաբկեն Հովակիմյանն ու նրա ընկերներն են եղել։

Factor TV-ն փորձեց կապ հաստատել Բաբկեն Հովակիմյանի հետ, «Միլլոն Մայնինգ»-ից մեզ փոխանցեցին, որ ավելի ուշ հետ կզանգահարեն։

Ռոզա Վարդանյան