Քաղաքականություն
26.06.2026 | 11:09
Սահմանադրական դատարանը հունիսի 25-ին աշխատակարգային նոր որոշում է ընդունել հունիսի 7-ի ընտրությունների արդյունքների վիճարկման գործով։
«Դեմոկրատիա Օրենք Կարգապահություն» կուսակցության ներկայացուցիչը միջնորդել էր դատարանին միավորված վարույթից առանձնացնել և առանձին սահմանադրական վարույթով քննել Սահմանադրական դատարան ներկայացված իրենց դիմումը։
Դատարանը մերժել է նշված միջնորդությունը, քանի որ ինչպես «Դեմոկրատիա Օրենք Կարգապահություն» կուսակցության, այնպես էլ «Ուժեղ Հայաստան» կուսակցությունների դաշինքի, «Միասնության թևեր» կուսակցության, «Բարգավաճ Հայաստան» կուսակցության, «Հանուն Հանրապետության ժողովրդավարության պաշտպանների դաշինք» կուսակցության, «Հայաստան» կուսակցությունների դաշինքի և «Նոր ուժ» ռեֆորմիստական կուսակցության դիմումները վերաբերում են նույն հարցին։
Հիշեցնենք՝ «Ուժեղ Հայաստան» կուսակցությունների դաշինքը պահանջում է անվավեր ճանաչել ընտրությունների արդյունքները և անցկացնել ընտրությունների երկրորդ փուլ։ «Հայաստան» դաշինքը միայն պահանջում է անվավեր ճանաչել ընտրությունների արդյունքները։
«Բարգավաճ Հայաստան» կուսակցության ներկայացուցիչները պնդում են, որ չեն հաղթահարել անցողիկ շեմը, քանի որ երեք ընտրատեղամասերում քվեարկության արդյունքներն անվավեր են ճանաչվել և ԿԸՀ-ն վերաքվեարկություն կազմակերպելու որոշում չի կայացրել։
Դատարանն աշխատակարգային որոշումներով արձանագրել է, որ դատավորներ Վլադիմիր Վարդանյանը և Արտակ Զեյնալյանը կանխակալ վերաբերմունք ունեն որպես կողմ հանդես եկող անձի, նրա ներկայացուցչի, դատավարության այլ մասնակիցների նկատմամբ: Նրանք չեն մասնակցի գործի քննությանը։
Եվգենյա Համբարձումյան
