Ղալիբաֆը Բաքվում հայտարարել է՝ Մերձավոր Արևելքի պատերազմի ավարտի գործարքը «ԱՄՆ պարտության հռչակագիրն» է

Իրանի և ԱՄՆ-ի միջև Մերձավոր Արևելքի պատերազմին վերջ դնելու գործարքն «Ամերիկայի պարտության հռչակագիրն է»։ Այս մասին հայտարարել է իրանական բանակցային թիմի ղեկավար, խորհրդարանի նախագահ Մոհամմադ Բաղեր Ղալիբաֆը։

«Իսլամաբադի համաձայնությունը ճնշման և հարկադրանքի արդյունք չէր, այլ քաջարի իրանական ազգի դիմադրության և հեղինակության արդյունք։ Ահա թե ինչու Իսլամաբադի համաձայնության հուշագիրը դարձավ Ամերիկայի պարտության հռչակագիր»,- ասել է Ղալիբաֆը Բաքվում Իսլամական համագործակցության կազմակերպության անդամ պետությունների խորհրդարանական միության համաժողովում ունեցած ելույթում՝ հավելելով, որ Մերձավոր Արևելքում անվտանգությունը պետք է ապահովեն տարածաշրջանի երկրները։

Նա նաև վերահաստատել է, որ Լիբանանում խաղաղությունը Վաշինգտոնի հետ վերջնական համաձայնության հասնելու հիմնարար հենասյունն է։

«Մեզ համար Լիբանանում հրադադարը նույնքան կարևոր է եղել և մնում է, որքան Իրանում հրադադարը, և Լիբանանում պատերազմի ավարտը նույնքան կարևոր է եղել, որքան Իրանում պատերազմի ավարտը»,- հավելել է Ղալիբաֆը։

Ըստ նրա՝ Իրանը պատրաստ է իսլամական երկրների հետ «անվտանգության համաձայնագրերի», ինչպես նաև «տնտեսական համագործակցության»։

«Իրանը պատրաստ է իսլամական երկրների, մասնավորապես, Պարսից ծոցի երկրների հետ անվտանգության համաձայնագրերի կնքման՝ կայուն տնտեսական համագործակցության միջոցով»,- ասել է Ղալիբաֆն ու նշել, որ ԱՄՆ-ի և Իսրայելի հետ վերջերս տեղի ունեցած պատերազմը «ոչ միայն ռազմական առճակատում էր», այլ «տարածաշրջանային ռազմավարական հավասարակշռությունը փոխելու կազմակերպված ջանք»։

Թարգմանությունը՝ Էմմա Չոբանյանի