Հավաքագրման պոտենցիալ կա, պետք է ավելացնել. Ավինյան․ ՏԵՍԱՆՅՈՒԹ

Երևանի քաղաքապետարանի գործակարգավարական խորհրդակցության ընթացքում քննարկվել են մայրաքաղաքում հասցեական ցուցանակների տեղադրման, առևտրային օբյեկտների թվայնացված հաշվառման և վերահսկողության նոր մեխանիզմների ներդրման աշխատանքները։

Առևտրի, ծառայությունների և գովազդի վարչության պետ Արմեն Առաքելյանը տեղեկացրեց, որ Մալաթիա-Սեբաստիա և Դավթաշեն վարչական շրջաններում նոր ձևաչափի ուղեցույց ցուցանակների տեղադրման աշխատանքները շարունակվում են։ Նրա խոսքով՝ արդեն պատվիրվել է 24 նոր ցուցանակ, որոնք կտեղադրվեն առաջիկա 15 օրերի ընթացքում։

Ավան վարչական շրջանում տեղադրվել է 220 ցուցանակ՝ փողոցների անվանումների և շենքերի համարների նշմամբ, ևս 132 ցուցանակի տեղադրումը նախատեսվում է ավարտել երկու օրվա ընթացքում։

Առաքելյանը նաև հայտնեց, որ ստեղծվել է փողոցային և ուղղորդող ցուցանակների GIS համակարգ, որտեղ իրականացվում է ցուցանակների հաշվառում և տվյալների մուտքագրում։

Նրա խոսքով՝ համակարգը թույլ է տալիս տեսնել՝ տվյալ օբյեկտն ունի՞ անհրաժեշտ թույլտվությունները, թե՞ ոչ, ինչպես նաև վերահսկել տեղական վճարների կատարումը։

«Ձեռք ենք բերել նաև պլանշետներ, որպեսզի մեր տեսուչները տեղում շրջայցերի ժամանակ կարողանան համադրել տվյալներն ու իրականացնել վերահսկողություն»,- ասաց վարչության պետը։

Տիգրան Ավինյանը նշեց, որ համակարգի հիմնական նպատակը ոչ թե պատահական ստուգումների իրականացումն է, այլ ռիսկային օբյեկտների բացահայտումն ու հասցեական վերահսկողությունը։

«Ոչ թե մենք գնանք և պատահականության սկզբունքով սկսենք ստուգումներ իրականացնել, այլ արդեն ունենանք որոշակի ռիսկայնության պրոֆիլ։ Եթե տեսնում ենք, որ տվյալ օբյեկտը նախորդ տարի ունեցել է համապատասխան թույլտվությունները, իսկ այս տարի որևէ թույլտվության համար չի դիմել, բայց շարունակում է գործունեությունը, այդտեղ արդեն պետք է ստուգում իրականացվի»,- ասաց քաղաքապետը։

Առաքելյանի խոսքով՝ այս պահին արդեն հաշվառվել է քաղաքի առևտրային օբյեկտների շուրջ 40 տոկոսը, և մոտ վեց վարչական շրջաններում աշխատանքներն ավարտվել են։ Մնացած վարչական շրջաններում գործընթացը նախատեսվում է ավարտել առաջիկա երկու-երեք ամիսների ընթացքում։

Երևանի փոխքաղաքապետն ընդգծեց, որ ստեղծվող համակարգի վերջնական նպատակը ռիսկային օբյեկտների թիրախային վերահսկողությունն է՝ առանց բարեխիղճ տնտեսվարողներին ավելորդ անհանգստացնելու։

«Գործիքակազմը հնարավորություն է տալիս ունենալ մի տեսակ «տաք քարտեզ», որտեղ երևում են բոլոր այն կետերը, որոնք ռիսկային են համարվում՝ վճարումներ չկատարելու կամ անհրաժեշտ թույլտվություններ չունենալու պատճառով»,- նշեց նա։

Ամփոփելով քննարկումը՝ Ավինյանը հանձնարարեց պատասխանատուներին մինչև հաջորդ գործակարգավարական խորհրդակցությունը ներկայացնել ժամկետներ, թե երբ է քաղաքապետարանը ամբողջությամբ անցնելու ռիսկերի վրա հիմնված վերահսկողության նոր մոդելին։

Խորհրդակցության ընթացքում ներկայացվեց նաև առանց համապատասխան թույլտվության տեղադրված ավտոմատ ինքնասպասարկող սարքերի վերաբերյալ վիճակագրությունը։ Ըստ քաղաքապետարանի տվյալների՝ հունիսի 22-ի դրությամբ մայրաքաղաքում հաշվառված է 414 նման սարքավորում, որոնց նկատմամբ վերահսկողության աշխատանքները շարունակվում են։

Մանրամասները՝ տեսանյութում։