Նուրբ և վերջին զգուշացումը բոլորին. Ավինյանը` կառուցապատողներին․ ՏԵՍԱՆՅՈՒԹ

Երևանի քաղաքապետ Տիգրան Ավինյանը գործակարգավարական խորհրդակցության ընթացքում հայտարարեց, որ մայրաքաղաքում ապօրինի շինարարությունների և շինարարական խախտումների նկատմամբ վերահսկողության ցուցանիշները նվազել են, և հանձնարարեց վերադառնալ նախկին ակտիվ աշխատանքի ռեժիմին։

Ներկայացված տվյալների համաձայն՝ հաշվետու ժամանակահատվածում քաղաքաշինական գործունեության ոլորտում իրականացված վերահսկողության արդյունքում ապօրինի շինությունների կառուցման և հողազավթման դեպքերով կազմվել է 54 արձանագրություն։ Դրանցից 8-ը կազմել է քաղաքաշինության և հողի վերահսկողության վարչությունը, 15-ը՝ հասարակական կարգի պահպանության ծառայությունը, իսկ 31-ը՝ վարչական շրջանների աշխատակազմերը։ Նախորդ ժամանակահատվածի համեմատ արձանագրությունների թիվը նվազել է 45-ով։

Հողօգտագործման ոլորտում սահմանված պայմանների խախտումների համար կազմվել է 11 արձանագրություն, ինչը նախորդ ժամանակահատվածի համեմատ 20-ով պակաս է։

Շինարարական հրապարակների համար սահմանված պայմանների չպահպանման դեպքերով կազմվել է 27 արձանագրություն։ Դրանց մի մասը վերաբերում է փոշեկլանիչ ցանցերի և օդի աղտոտվածությունը չափող սարքերի բացակայությանը։ Այս ուղղությամբ ևս արձանագրությունների թիվը նախորդ ժամանակահատվածի համեմատ նվազել է՝ 95-ով։

Զեկուցման համաձայն՝ առանց շահագործման թույլտվության շինությունների օգտագործման դեպքերով կազմվել է 8 արձանագրություն։ Ապօրինի շինությունների, ավտոտնակների և կրպակների ապամոնտաժման ուղղությամբ իրականացվել է 32 աշխատանք, ինչը նախորդ ժամանակահատվածի համեմատ 36-ով պակաս է։

Ամփոփելով ներկայացված տվյալները՝ Ավինյանը նշեց, որ թվերը վկայում են ակտիվության նվազման մասին։

«Այս թվերը ցույց են տալիս որոշակի ակտիվության նվազեցում, և կարծում եմ՝ մենք պետք է վերադառնանք մեր սովորական ռեժիմին»,- ասաց նա։

Ավինյանի խոսքով՝ ՏԻՄ նոր օրենքի կարգավորումներով էականորեն խստացվելու են կառուցապատողների նկատմամբ կիրառվող տուգանքները, այդ թվում՝ փոշեկլանիչ ցանցերի բացակայության, շինհրապարակների ոչ պատշաճ կահավորման և այլ խախտումների համար։

«Շատ նուրբ և վերջին զգուշացում բոլորին»,- ասաց քաղաքապետը։

Մանրամասները՝ տեսանյութում։