04.09.2026 | 23:57
Էդուարդ Սպերցյանի գոլն օգնեց «Ալ Ահլիին» վստահ հաղթանակ տանել. ՏԵՍԱՆՅՈՒԹ
Ռոբերտ Քոչարյանի վարույթը վերաբերում է 2004 թվականի մի գործարքի. Արամ Օրբելյան․ ՏԵՍԱՆՅՈՒԹ
Հասարակություն
17.06.2026 | 17:01
ՀՀ 2-րդ նախագահ, «Հայաստան» դաշինքի պատգամավորի թեկնած Ռոբերտ Քոչարյանի գործը վերաբերում է 2004 թվականին կառավարության որոշմամբ հաստատված մի գործարքի, որը երբևէ չի վիճարկվել, իսկ Ռոբերտ Քոչարյանը որևէ առնչություն չի ունեցել դրա հետ։ Այս մասին ԿԸՀ-ի դիմաց լրագրողների հետ զրույցում ասաց փաստաբան Արամ Օրբելյանը:
Փաստաբանը պարզաբանեց, որ խոսքը Երևանի «Մաստեր կլաս» թենիսի համալիրի տարածքի մասին է։ Օրբելյանի խոսքով՝ տարածքը չի օտարվել, այլ տրվել է վարձակալության, իսկ հետագայում այնտեղ իրականացված շինարարությունը կատարվել է ներդրողի միջոցներով։
«Հողի օտարում չի եղել, վարձակալությամբ է հանձնել այդ հատվածը, որի վրա վրա այլ անձ սկսել է կառուցել իր միջոցներով։ Այդ անձը կա, ռեալ է, Թենիսի ֆեդերացիայի նախագահն է»,- նշեց նա։
Օրբելյանի փոխանցմամբ՝ 2008 թվականի տնտեսական ճգնաժամից հետո ընկերությունը ֆինանսական խնդիրների առաջ է կանգնել, ինչից հետո ներդրողների ներգրավման գործընթացում մասնակցություն է ունեցել նաև Սեդրակ Քոչարյանը։ «Սեդրակ Քոչարյանը տարածք չի գնել, ներդրում է կատարել ընկերությունում»,- ընդգծեց փաստաբանը:
Անդրադառնալով մեղադրանքի հիմքերին՝ Օրբելյանը նշեց, որ հրապարակվող որոշ տեղեկություններ չեն համապատասխանում իրականությանը։
Լրագրողների հարցին, թե ինչու է ավելի քան 20 տարվա վաղեմության գործը հենց հիմա ակտիվացվել, փաստաբանը այն կապեց քաղաքական գործընթացների հետ։
«Ես դա փոխկապակցում եմ քաղաքական գործընթացների հետ և բացառապես այլ դրդապատճառ չեմ տեսնում։ Բացի այդ, հնարավոր բոլոր տարբերակներով վաղեմության ժամկետները վաղուց անցել են»,- հայտարարեց Օրբելյանը։
Նշենք, որ Գլխավոր դատախազությունը միջնորդություն է ներկայացրել Կենտրոնական ընտրական հանձնաժողով` «Հայաստան» դաշինքի առաջնորդ Ռոբերտ Քոչարյանի նկատմամբ քրեական հետապնդում հարուցելու համար: Թե ինչ քրեական վարույթով` չեն մանրամասնում: Կիրակի` հունիսի 14-ին, արգելվել էր Քոչարյանի ելքը ՀՀ տարածքից: Նրա որդին` Լևոն Քոչարյանը, մեզ հետ զրույցում ասել էր, որ հայրը անձնական հարցերով պատրաստվում էր մեկնել Ռուսաստան:
Factor TV-ն ավելի վաղ գրել էր, որ Քոչարյանը առկա հայտնի տվյալներով մեղադրյալ չէ ՀՀ-ում քննվող որևէ գործով, որի շրջանակներում նրան կարող էր չթույլատրվել լքել ՀՀ տարածքը։ ԿԸՀ նիստը դռնփակ է:
Մանրամասները` տեսանյութում:
Արփի Հակոբյան
