Իսրայելն ավիահարվածներ է հասցրել Լիբանանի հարավին

Իսրայելական ուժերն ավիահարվածներ են հասցրել հարավային Լիբանանի մի քանի շրջանների՝ չնայած Մերձավոր Արևելքում  խաղաղության գործարքը ներառում է նաև Լիբանանը, գրում է France 24-ը։

Լիբանանի ազգային լրատվական գործակալությունը (NAA) հայտնել է, որ իսրայելական ռազմական ինքնաթիռներն ավիահարվածներ են հասցրել Նաբաթիե ալ-Ֆաուքա շրջանին և հարևան Քֆար Թեբնիտ քաղաքի արևելյան ծայրամասին։ Ըստ լրատվականի՝ իսրայելցիները նաև անօդաչու թռչող սարքով հարվածել են Զահրանի շրջանի Անսարիե քաղաքին։

Նշենք, որ Իսրայելի՝ շաբաթներ շարունակվող օդային հարվածներն ավերածություններ են առաջացրել Լիբանանի հարավում: Երեքշաբթի երկրի Առողջապահության նախարարությունը հայտնել է, որ պատերազմի սկսվելուց ի վեր զոհերի թիվը հասել է 3,826-ի, քանի որ փրկարարները փլատակների տակից ավելի շատ մարմիններ են դուրս բերել:

ԱՄՆ-Իրան խաղաղության համաձայնագիրը ներառում է նաև Լիբանանը, սակայն Իսրայելի վարչապետ Բենիամին Նեթանյահուն երկուշաբթի հայտարարել էր, որ իսրայելական ուժերը կմնան երկրում «այնքան ժամանակ, որքան անհրաժեշտ է»։

Իրանի արտաքին գործերի նախարար Աբբաս Արաղչին երեքշաբթի հայտարարել է, որ հակամարտությունը չի ավարտվի, եթե իսրայելական ուժերը դուրս չբերվեն Լիբանանի տարածքից։

«Սիոնիստական ​​ռեժիմի կողմից այսուհետ Լիբանանի վրա ցանկացած ռազմական հարձակում և Լիբանանի տարածքների շարունակական օկուպացիա մեր կողմից կհամարվի փոխըմբռնման հուշագրի խախտում»,- ասել էր Արաղչին։

Թարգմանությունը՝ Էմմա Չոբանյանի