14.09.2026 | 23:23
Պապիկյանի գլխավորած պատվիրակությունն աշխատանքային այցով մեկնել է Չինաստան
Ալիևն ԱՄՆ կոնգրեսականի հետ TRIPP-ին առնչվող հարցեր է քննարկել
Քաղաքականություն
17.06.2026 | 14:53
Ադրբեջանի նախագահ Իլհամ Ալիևն ընդունել է ԱՄՆ Կոնգրեսի Ներկայացուցիչների պալատի անդամ Աբրահամ Համադեին։ Ադրբեջանական կողմի հաղորդմամբ՝ Իլհամ Ալիևն ընդգծել է, որ «Ադրբեջանի Հանրապետության կառավարության և Ամերիկայի Միացյալ Նահանգների կառավարության միջև ռազմավարական գործընկերության մասին խարտիայի» ստորագրումը պատմական նշանակություն ունի հարաբերությունների ընդլայնման առումով։
Զրույցի ընթացքում անդրադարձ է եղել այն բանին, որ Աբրահամ Համադեն ԱՄՆ Կոնգրեսում ներկայացված օրինագծի հեղինակն է՝ կապված «Ազատության աջակցության մասին» օրենքի 907-րդ փոփոխության չեղարկման հետ։
Ընդգծվել է նաև ԱՄՆ նախագահ Դոնալդ Թրամփի դերը Ադրբեջանի և Հայաստանի միջև խաղաղության օրակարգի առաջխաղացման գործում, նշվել են այն հնարավորությունները, որոնք TRIPP միջանցքի ստեղծումը կբացի տարածաշրջանային տրանսպորտային կապի զարգացման համար։
Հանդիպմանը նաև մտքեր են փոխանակվել Ադրբեջանի և ԱՄՆ Կոնգրեսի միջև երկխոսության ամրապնդման վերաբերյալ, քննարկվել են ադրբեջանա-ամերիկյան գործընկերության հեռանկարները, ինչպես նաև ընդգծվել է առևտրի, տնտեսության, ներդրումների, էներգետիկայի, անվտանգության, կապի, տեխնոլոգիաների և այլ ոլորտներում համագործակցության ընդլայնման լավ հնարավորությունների առկայությունը։
Հիշեցնենք, որ վերջերս Իլհամ Ալիևը շնորհակալություն էր հայտնել ԱՄՆ նախագահ Դոնալդ Թրամփին «Ազատության աջակցության մասին» ակտի 907-րդ փոփոխության կասեցումը երկարաձգելու համար։ Բաքուն, սակայն, մեծ ջանքեր է գործադրում օրենքի չեղարկմանը հասնելու համար․ դրա համար անհրաժեշտ է ԱՄՆ Կոնգրեսի հավանությունը։
Թարգմանությունը՝ Էմմա Չոբանյանի
