Իրանի ԱԳՆ հայտարարել է, որ ԱՄՆ-ի հարվածները հրադադարը «գործնականում անիմաստ են դարձնում»

Իրանի արտաքին գործերի նախարարությունը դատապարտել է ԱՄՆ-ի վերջին հարվածները՝ նշելով, որ այդ հարձակումները գրեթե երկամսյա հրադադարը «գործնականում անիմաստ» են դարձրել, գրում է France 24-ը։

Հայտարարության մեջ նշվում է, որ «վերջին ժամերին Միացյալ Նահանգների կողմից իրականացված անօրինական և հանցավոր հարձակումները ոչ միայն կոպիտ խախտում են, այլև գործնականում անիմաստ են դարձնում հրադադարը»։ Ասվում է, որ «այս հանցավոր գործողության չափազանց լուրջ հետևանքների պատասխանատվությունը կրում են Միացյալ Նահանգների ղեկավարները»։

Միաժամանակ, երեք իրանական աղբյուրներ Reuters-ին հայտնել են, որ Իրանի և ԱՄՆ-ի միջև նախնական համաձայնության հասնելու ջանքերն ակտիվացել են, քանի որ նրանք քննարկում են իրանական սառեցված միջոցների ազատման մեխանիզմը։

Հիշեցնենք, որ ԱՄՆ-ը կրկին հարվածել է Իրանին, Թեհրանն էլ հայտարարել է Հորմուզի նեղուցը փակելու մասին։ Միաժամանակ, Հորմուզի նեղուցի վերահսկողության նոր մարմինը հինգշաբթի հաստատել է ռազմավարական ջրային ուղու լիակատար փակման հրամանը՝ մինչև հետագա ծանուցումը։

«Տարածաշրջանում ամերիկյան ուժերի ագրեսիայի և Իրանի զինված ուժերի կողմից երեկ երեկոյան արված հայտարարության պատճառով Հորմուզի նեղուցը փակ կլինի մինչև հետագա ծանուցում։ Տարանցիկ թույլտվություն ստացած դիմորդներին խնդրում ենք համբերատար լինել և սպասել PGSA-ի հրահանգներին»,- X-ում հրապարակված գրառման մեջ նշել է Պարսից ծոցի նեղուցի վարչությունը (Persian Gulf Strait Authority)։

Թարգմանությունը՝ Էմմա Չոբանյանի