Ընտրակաշառքի համար՝ բանտ մինչև հաջորդ ընտրություններ․ Փաշինյանի հանձնարարականը․ ՏԵՍԱՆՅՈՒԹ

«Ես ուզում եմ մտահոգությունս հայտնել հետևյալի հետ կապված, որ Հայաստանում ընդհանրապես կան հանցագործությունների տեսակներ, որոնց նկատմամբ ինչ-որ այդպիսի հանդուրժողականության չհամաձայնեցված մթնոլորտ է ձևավորված։ Մի ուղղությունը ընտանեկան բռնությունների հետ կապված ուղղությունն է, մյուս ուղղությունը՝ ընտրակաշառքների հետ կապված ուղղությունը, որովհետև ընտրություններն անցնում են, արդեն ասում ենք՝ «դե լավ, դե անցան ընտրությունները», հետևաբար ընտրակաշառք տվողները և ստացողները կարող են գնալ իրենց գործերին»,-Կառավարությունում հրավիրված խորհրդակցության ժամանակ նշեց վարչապետ Նիկոլ Փաշինյանը։

«Ես կարծում եմ, որ այս պրակտիկան պետք է արմատապես փոխվի։ Այս ընտրություններում ընտրակաշառք տալու կամ վերցնելու մեջ բռնված ցանկացած ոք մինչև հաջորդ ընտրությունների արդյունքների ամփոփումը պետք է անցկացնի բանտում։

Եթե սրա համար անհրաժեշտ է իրականացնել օրենսդրական, ինստիտուցիոնալ փոփոխություններ, այդ փոփոխությունները անհրաժեշտ է հիմա՝ անհապաղ ձևով անել, բայց ես չեմ կարծում, թե դրա համար պետք են փոփոխություններ։ Ես հստակ պահանջում եմ, որ նրանք, ովքեր ընտրակաշառք վերցնելու կամ տալու մեջ բռնվել են, մինչև հաջորդ համապետական ընտրությունների պաշտոնական արդյունքների ամփոփման առնվազն օրը պետք է լինեն բանտում։

Սա երկրի անվտանգության և ժողովրդավարության անվտանգության հարց է, և պետք չէ հետո խղճահարության տեսարաններ սարքել։ Խղճահարության տեսարանները վաղուց սարքված են, և եթե մենք հոգատարության խնդիր ունենք, առաջին հերթին մեր պետությունը պետք է լինի մեր հոգատարության առարկան, մեր ժողովուրդը և նրա ազատ կամքը ու նրա ազատ կամքի արտահայտման հնարավորությունը»,- ասաց նա։

Մանրամասները՝ տեսանյութում։