06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Գագիկ Ծառուկյանը Հանրայինից 6 մլն դրամ է պահանջում՝ մայիսի 24-ի ռեպորտաժի համար
Քաղաքականություն
08.06.2026 | 16:50
«Բարգավաճ Հայաստան» կուսակցությունը և Գագիկ Ծառուկյանը հայցադիմում են ներկայացրել Երևանի ընդհանուր իրավասության դատարան ՝ ընդդեմ Հայաստանի հանրային հեռուստաընկերության մայիսի 24-ին արված հրապարակման համար։ Այն շուրջ 49 հազար դիտում ունի։
Հայցվորների պնդմամբ՝ «Քոչարյանի դրդմամբ՝ ԲՀԿ հիմնում, Սարգսյանի հետ կոալիցիա. Քաղաքական էջը փակել-բացելու Ծառուկյանի ուղին» վերտառությամբ նյութի և տեսանյութի ընթացքում Գագիկ Կոլյայի Ծառուկյանի և «Բարգավաճ Հայաստան» կուսակցության վերաբերյալ հրապարակված տվյալները չեն համապատասխանում իրականությանը՝ սուտ են։
«Տեսանյութը կազմվել և տեղեկատվությունը ներկայացնում է միակողմանի, ռեպորտաժը պատրաստելիս «Հայաստանի հանրային հեռուստատեսություն» ՓԲ ընկերությունը տեղեկատվությունը չի ներկայացրել բարեխիղճ և հավասարակշռված, լրատվականը չի ձեռնարկել ողջամիտ միջոցներ պարզելու տեսանյութի մեջ ներկայացվող տվյալների ճշմարտացիությունը և հիմնավորվածությունը։ Մասնավորապես իրականությունը չի համապատասխանում այն, որ «Բարգավաճ Հայաստան» կուսակցությունը ստեղծվել է որևէ քաղաքական ուժի կամ գործչի դրդմամբ, կամ գործել է որևէ անձի հովանավորչությամբ, նշված բոլոր թեզիսները և պնդումները սխալ են։ Տեսանյութը ներկայացվել է տեսանյութի հրապարակման պահին իշխող քաղաքական ուժի օրակարգին համահունչ՝ այն ծառայեցնելով վերջիններիս շահին և ընտրություններում այլ թեկնածուների նկատմամբ առավելություն ձեռք բերելուն»,-նշվում է հայցադիմումի մեջ։
Բացի այդ, Ծառուկյանը 6 միլիոն դրամի չափով փոխհատուցում է պահանջում Հանրայինից։
Ռեպորտաժում, օրինակ, նշվում է․ «Սերժ Սարգսյան-Գագիկ Ծառուկյան ջրերը թեպետ միշտ չէ, որ նույն առվով են հոսել, սակայն քիչ չեն եղել նաև մերձեցման պահերը: 2008-ի մարտի 1-ի դեպքերից 20 օր անց քաղաքական կոալիցիայի համաձայնագիր ստորագրեցին Հանրապետականը, Բարգավաճը, Դաշնակցությունն ու ՕԵԿ-ը։ Ծառուկյանի համար դժվար ժամանակները սկսեցին 2012-ից՝ Սարգսյանի հետ առճակատումից հետո: Նա քաղաքական փակված էջը կրկին բացեց 2017-ի խորհրդարանի ընտրությանը, և արդեն 2020-ին մեղադրվում էր ընտրակաշառքի համար»:
Հունիսի 5-ին գործը մակագրվել է դատավոր Գուրգեն Քոթանջյանին։
Եվգենյա Համբարձումյան
