«Խախտումներ արձանագրվել են շուրջ 800 տեղամասում կամ դիտարկված տեղամասերի 44%-ում». Դանիել Իոաննիսյան․ ՏԵՍԱՆՅՈՒԹ

«Անկախ դիտորդ» դաշինքի անդամ Դանիել Իոաննիսյանը հայտնել է որ արդեն այցելել են 1830 տեղամաս, ինչը կազմում է ընդհանուր տեղամասերի գրեթե 92%-ը։ Խախտումներ արձանագրվել են շուրջ 800 տեղամասում կամ դիտարկված տեղամասերի 44%-ում։

Ըստ Իոաննիսյանի՝ դիտարկված տեղամասերի 7%-ում արձանագրվել են ընթացակարգային խախտումներ, 6%-ում՝ քվեարկության գաղտնիության հետ կապված խնդիրներ, ևս 6%-ում՝ գաղտնիության հետ կապված ռիսկեր ստեղծող խախտումներ։ Բանավեճ կամ լարված մթնոլորտ արձանագրվել է ընտրատեղամասերի 3%-ում, իսկ քարոզչության դրսևորումներ՝ դիտարկված տեղամասերի 3%-ում։

«Քարոզչության դրսևորումները հիմնականում եղել են քարոզչական բովանդակություն պարունակող շապիկներ, գլխարկներ և կրծքանշաններ։ Այդ դեպքերը հիմնականում արձանագրվել են օրվա սկզբին և արդեն լուծվել են»,-ասաց Դանիել Իոննիսյանը։

Խախտումների հեղինակների նույնականացման հնարավորության դեպքում արձանագրվել է, որ դեպքերի մոտ 7,5%-ում խախտման հեղինակը տեղամասային ընտրական հանձնաժողովն է եղել, մոտ 1%-ում՝ ոստիկանության ծառայողները, մոտ 7,8%-ում՝ վստահված անձինք, իսկ մոտ 9,5%-ում՝ ընտրողները։ Այն դեպքերում, երբ հնարավոր է եղել նույնականացնել խախտում կատարողի կուսակցական պատկանելությունը, ըստ Իոաննիսյանի, դեպքերի 39%-ում խախտման հեղինակը եղել է «Ուժեղ Հայաստան»-ը, 29%-ում՝ «Քաղաքացիական պայմանագիր»-ը, 9%-ում՝ «Հայաստան» դաշինքը, իսկ մոտ 8%-ում՝ «Բարգավաճ Հայաստան» կուսակցությունը։