06.06.2026 | 22:18
Երկրաշարժ Սպիտակ քաղաքից 11 կմ հարավ-արևելք
11 երկրի ներկայացուցիչներ կմասնակցեն Խաչատրյանի անվան միջազգային մրցույթին
Մշակույթ
06.06.2026 | 18:33
Հունիսի 6-ը մեծանուն կոմպոզիտոր Արամ Խաչատրյանի ծննդյան օրն է։ Օրվա շրջանակում այսօր կմեկնարկի Խաչատրյանի անվան միջազգային 22-րդ մրցույթը՝ «Թավջութակ» մասնագիտությամբ։ Մրցույթն իրականացվում է ԿԳՄՍ նախարարության աջակցությամբ և «Արամ Խաչատրյան» մշակութային հիմնադրամի կազմակերպմամբ։ Այս մասին տեղեկացնում են ԿԳՄՍՆ-ից։
«Այդ կապակցությամբ Արամ Խաչատրյանի տուն-թանգարանում տեղի է ունեցել մրցույթի մեկնարկի մամուլի ասուլիսը, որի բանախոսներն էին ԿԳՄՍ նախարարի տեղակալ Դանիել Դանիելյանը, Խաչատրյանի անվան միջազգային մրցույթի հոգաբարձուների խորհրդի նախագահ Արմեն Սմբատյանը, «Արամ Խաչատրյան» մշակութային հիմնադրամի տնօրեն Մարտին Թովմասյանը, մրցույթի ռազմավարական գործընկեր, Freedom broker Armenian-ի տնօրեն Հովակ Հովակիմյանը։
Դանիել Դանիելյանը շնորհավորել է ներկաներին մրցույթի բացման առիթով՝ ընդգծելով՝ վերջին տարիներին միջազգային համագործակցության մեծ դինամիկա կա։ «Անուններ, որոնք մեզ համար դարձել են սովորական և առօրյայի մաս, միջազգային համագործակցության տիրույթում մեկ այլ տեսանկյունից են վերարժևորվում։ Աշխարհում Հաայաստանը ճանաչելի է նախևառաջ մեր մշակույթով ու մեծանուն մարդկանցով։ Ժառանգությունը պահպանելով և դրա վրա հիմնվելով՝ պետք է կառուցենք այսօրվա արվեստն ու մշակույթը։ Հաշվի առնելով, որ մշակույթը պետականության ամրության հիմքում է և ժողովրդի ինքնության բաղադրիչ է՝ այս ուղղությամբ պետությունը բազմաթիվ ծրագրեր է իրականացնում՝ բացահայտելով նոր տաղանդների և ներգրավելով միջազգային դեմքերի»,-ասել է Դանիել Դանիելյանը՝ նշելով՝ Արամ Խաչատրյանը պետք է դառնա ոչ միայն մեր մշակույթի, այլև ամբողջ պետության բրենդը։
Արմեն Սմբատյանը ևս շնորհավորել է տոնի կապակցությամբ՝ ներկայացնելով մրցույթի նախապատմությունը՝ որպես Արամ Խաչատրյան արվեստագետի արժևորման քայլ։ Որպես բոլոր կողմերի համագործակցության արդյունք՝ նա տեղեկացրել է, որ Չինաստանում կազմակերպում են «Արամ Խաչատրյան» մրցույթի մրցանակաբաշխություն, և հանրահայտ տարբեր երաժիշտներ մշտապես կատարում են Խաչատրյանի ստեղծագործությունները, ինչը խոսում է նրա արվեստի արժեքի մասին։
Մարտին Թովմասյանն առանձնահատուկ շնորհակալություն է հայտնել գործընկերներին՝ ի դեմս ԿԳՄՍ նախարարությանը, ինչպես նաև մասնակիցներին՝ հաջողություն մաղթելով նրանց և ընդգծելով, որ մրցույթը չի ճանաչում աշխարհագրական որևէ սահման։ Հովակ Հովակիմյանը նշել է, որ Freedom broker Armenian ընկերության համար շատ կարևոր է լինել մրցույթի գործընկերը։
Տեղեկացվել է, որ մրցույթին մասնակիցները ներկայացնում են 11 երկիր, այդ թվում՝ Ֆրանսիան, ԱՄՆ-ն, Իսպանիան, Հարավային Կորեան, ՌԴ-ն, Չինաստանը և այլն։
Ասուլիսին հաջորդել է հարցուպատասխանը, այնուհետ վիճակահանությունը՝ որոշելու, թե մասնակիցները որ համարի տակ են ելույթ ունենալու»,- ասվում է հաղորդագրությունում։
