28.09.2026 | 02:28
«Արդարացում չունեցող կոպիտ սխալ». Թաթա Սիմոնյանը ներողություն է խնդրել սեպտեմբերի 27-ին իր համերգի ցուցադրության համար
Բիթքոյնը կորցնում է գրավչությունը․ ներդրողները նախընտրում են AI ընկերություններն ու խոշոր IPO-ները
Հաղորդաշարեր
06.06.2026 | 19:05
Աշխարհի ամենախոշոր կրիպտոարժույթը՝ բիթքոյնը, 2026 թվականին գրանցում է վերջին առնվազն տասը տարվա ամենաթույլ արդյունքներից մեկը։ Reuters-ի փոխանցմամբ՝ ներդրողները կապիտալը տեղափոխում են արհեստական բանականության (AI) ոլորտի բաժնետոմսեր և սպասվող խոշոր առաջնային հրապարակային առաջարկներ (IPO-ներ), ինչի հետևանքով բիթքոյնի նկատմամբ հետաքրքրությունը նվազում է։
Այս շաբաթ բիթքոյնի արժեքը նվազել է մոտ 15 տոկոսով՝ հասնելով շուրջ 63 հազար դոլարի։ Սա ամենախոշոր շաբաթական անկումն է 2022 թվականի նոյեմբերից ի վեր, երբ սնանկացավ FTX կրիպտոհարթակը։ Տարվա սկզբից բիթքոյնը կորցրել է իր արժեքի շուրջ մեկ երրորդը, ինչը 2015 թվականից ի վեր այս ժամանակահատվածի համար ամենավատ ցուցանիշն է։
Շուկայի վրա լրացուցիչ ճնշում է գործադրել նաև Strategy ընկերությունը (նախկինում՝ MicroStrategy), որը հանդիսանում է բիթքոյնի ամենամեծ կորպորատիվ սեփականատերը։ Ընկերությունը հայտարարել է, որ 2022 թվականից հետո առաջին անգամ վաճառել է իր բիթքոյնների մի մասը։
RBC BlueBay Asset Management-ի գլխավոր ներդրումային տնօրեն Մարկ Դաուդինգի խոսքով՝ բիթքոյնի ներկայիս իրավիճակը ցույց է տալիս, թե որքան արագ կարող են ներդրումային ակտիվները դուրս գալ շուկայի ուշադրության կենտրոնից։
Բիթքոյնի դիրքերի թուլացման պատճառներից մեկը նաև այն է, որ վերջին տարիներին կրիպտոշուկա են մուտք գործել խոշոր ֆինանսական հաստատություններ, ներդրումային բանկեր և բորսայական ֆոնդեր (ETF-ներ)։ Արդյունքում բիթքոյնը կորցրել է այն առանձնահատկությունները, որոնք նախկինում այն դարձնում էին ներդրումային պորտֆելների դիվերսիֆիկացման գործիք՝ բարձր տատանողականությունն ու ավանդական շուկաներից հարաբերական անկախությունը։
Reuters-ը նշում է, որ մինչև 2020 թվականը բիթքոյնի և ամերիկյան S&P 500 ֆոնդային ինդեքսի միջև հստակ կապ գրեթե չկար։ Սակայն վերջին վեց տարիների ընթացքում դրանք հիմնականում շարժվել են նույն ուղղությամբ։ Վերջին շրջանում, սակայն, այդ կապը փոխվել է․ AI տեխնոլոգիաներով զբաղվող ընկերությունների բաժնետոմսերը շարունակում են արագ աճել, մինչդեռ բիթքոյնը հետ է մնում շուկայից։
Վերլուծաբանների գնահատմամբ՝ ներդրողների ուշադրությունը ներկայումս կենտրոնացած է հատկապես արհեստական բանականության ոլորտի առաջատար ընկերությունների և սպասվող խոշոր IPO-ների վրա, այդ թվում՝ SpaceX-ի հնարավոր հրապարակային տեղաբաշխման շուրջ սպասումների ֆոնին։
