13.09.2026 | 21:40
Ցեմենտի շուկայում պակասուրդը պայմանավորված է հարևան երկրներից եկող մատակարարումների խաթարումներով․ Գևորգ Պապոյան
Ում օգտին կքվեարկեն ՀՀ քաղաքացիները, եթե ընտրությունները լինեն վաղը․ ArmES-ի նոր հարցման տվյալները
Քաղաքականություն
04.06.2026 | 17:37
«Ո՞ւմ օգտին կքվեարկեիք, եթե խորհրդարանական ընտրությունները լինեին վաղը»․ այս հարցին են պատասխանել ArmES-ի («Հայաստանի ընտրական համակարգի ուսումնասիրության կենտրոն»-ի) կողմից իրականացված ընտրողների վարքագծի ուսումնասիրության մասնակիցները։ Կազմակերպությունը հրապարակել է 2026 թվականի խորհրդարանական ընտրություններին ընդառաջ անցկացված հետազոտության չորրորդ փուլի արդյունքները։
Մայիսյան հարցման տվյալներով՝ առաջատարը շարունակում է մնալ «Քաղաքացիական պայմանագիր» կուսակցությունը՝ 36.2 տոկոս աջակցությամբ։ Երկրորդ տեղում «Ուժեղ Հայաստանն» է՝ 12.2 տոկոսով, իսկ «Հայաստան» դաշինքը և «Բարգավաճ Հայաստանը» ստացել են համապատասխանաբար 4.8 և 3.1 տոկոս։ Միևնույն ժամանակ, հարցվածների զգալի մասը կամ հրաժարվել է պատասխանել (26.2%), կամ դեռ չի կողմնորոշվել (10.6%)։
Ապրիլին «Քաղաքացիական պայմանագրի» աջակցությունը կազմել էր 32.5 տոկոս, «Ուժեղ Հայաստանինը»՝ 10.01 տոկոս, «Հայաստան» դաշինքինը՝ 4.4 տոկոս, իսկ «Բարգավաճ Հայաստանինը»՝ 3.4 տոկոս։ Այդ ժամանակ հրաժարվել էր պատասխանել հարցվածների 25.4 տոկոսը, իսկ 14.01 տոկոսը նշել էր, որ դեռ չի որոշել իր ընտրությունը։
Հետազոտության համաձայն՝ չկողմնորոշված և ոչ հստակ ընտրություն ունեցող քաղաքացիների մասնաբաժինը շարունակում է մնալ բարձր։
Հետազոտության հեղինակները նշում են, որ այս խումբը միասին կազմում է ընտրազանգվածի շուրջ 35-40 տոկոսը և կարող է վճռորոշ դեր ունենալ ընտրությունների վերջնական արդյունքների ձևավորման հարցում։
Երբ հարցրել են՝ արդյոք մասնակցելու են ընտրություններին, հարցվածների շուրջ 90 տոկոսը դրական պատասխանել է տվել։ Սակայն հետազոտության հեղինակները զգուշացնում են, որ նման ցուցանիշները սովորաբար չեն արտացոլում իրական մասնակցությունը, քանի որ նախորդ ընտրությունների փորձը ցույց է տալիս, որ ընտրություններին մասնակցելու պատրաստակամության մասին հայտարարող քաղաքացիների մի մասը, ի վերջո, չի մասնակցում քվեարկությանը։
Անի Թամրազյան
