Մենք վստահելի գործընկեր ենք, մենք չենք սպառնում, չենք ճնշում, այլ օգնում ենք․ Օլիվիե Դըկոտինյի․ ՏԵՍԱՆՅՈւԹ

«Մենք՝ Եվրոպական միությունը, ձեռք ձեռքի տված աշխատում ենք Հայաստանի Հանրապետության կառավարության և Հայաստանում գործող ընկերությունների հետ, որպեսզի օգնենք ձեզ հաղթահարել այն ճնշումը, որը դուք տեսնում եք այսօր»․ այս մասին տնտեսվարողների հետ հանդիպումից հետո լրագրողների հետ զրույցում նշեց Հայաստանում Ֆրանսիայի դեսպան Օլիվիե Դըկոտինյին։

«Մենք նաև գործնական քննարկում ենք ունեցել այսօրվա հանդիպման շրջանակներում, որը ներառել է լոգիստիկ և այլ հարցեր՝ եվրոպական շուկաներ ներմուծումների վերաբերյալ, ինչպես նաև հնարավորություն ստեղծելու, որպեսզի հայաստանյան արտադրողը հանդիպի եվրոպական արտադրողի հետ և ապահովի մուտքը եվրոպական շուկա՝ արտահանումներ իրականացնելու համար։ Այսօր ավելի ուշ ավելի կարևոր հայտարարություններ են արվելու, և այս առումով մենք շարունակում ենք համագործակցությունը։

Եվրոպական միությունը և եվրոպացի բարեկամները ձեզ չեն խնդրում ընտրություն կատարել։ Մենք վստահելի գործընկեր ենք, մենք չենք սպառնում, մենք ճնշում չենք գործադրում, մենք օգնում ենք։ Եվ մենք ուզում ենք վստահ լինել, որ Հայաստանի ընթացիկ համագործակցությունը ամենամեծ տնտեսական ցանցի՝ Եվրոպական միության հետ, շարունակվում է և ձեզ դարձնում է ապահով»,- ասաց դեսպանը։

Նշենք՝ ավելի ուշ Եվրահանձնաժողովի նախագահ Ուրսուլա ֆոն դեր Լեյենը հայտնեց, որ ԵՄ-ն 50 մլն եվրո անհապաղ օգնություն կտրամադրի ՀՀ-ին, վաղը 10,000 ծաղիկների խմբաքանակը կլինի Լատվիայում։ Կլինի նաև ավելին։ Հայկական որոշ ապրանքների, մասնավորապես, գյուղմթերքի առևտուրը թեթևացնելու միջոցառումներ կձեռնարկվեն»։

Ըստ ֆոն դեր Լեյենի՝ տուժած ոլորտներին, ինչպիսիք են հայկական ծաղկի ոլորտը, գործնական աջակցություն է տրվում, հաշվի առնելով, որ Ռուսաստանը վերջերս սահմանափակել է Հայաստանից ծաղիկների ներմուծումը կասկածելի մեղադրանքների պատճառով։ Նախատեսվում է, որ վաղը Լատվիա է ժամանելու 10,000 ծաղիկ, որին կհետևեն այլ խմբաքանակներ։

Եվգենյա Համբարձումյան