06.09.2026 | 22:03
«Սուրբ Հովհաննես» մատուռ բարձրացող քաղաքացին վնասել է ոտքը․ փրկարարներն օգնել են
Իսրայելի պաշտպանության նախարարը հայտարարել է Լիբանանում գործողությունները շարունակելու մասին՝ չնայած հրադադարի համաձայնագրին
Քաղաքականություն
04.06.2026 | 14:03
Իսրայելի պաշտպանության նախարար Իսրայել Կացը բարձր է գնահատել Իսրայելի և Լիբանանի միջև կնքված հրադադարի համաձայնագիրը՝ ասելով, որ այն կարող է հանգեցնել երկարատև խաղաղության համաձայնագրի, գրում է CNN-ը։
«Սա արտացոլում է այն իրականությունը, որը մենք մինչ օրս ստեղծել ենք Լիբանանում։ Իրականություն, որը, կախված տեղում զարգացումներից և Իսրայելի շահերի նկատմամբ մեր շարունակական անզիջում դիրքորոշումից, կարող է հանգեցնել Լիբանանի հետ քաղաքական խաղաղության համաձայնագրի և, ամենակարևորը, հյուսիսային բնակիչների համար իրական և երկարատև անվտանգության ապահովմանը՝ 50 տարվա ընթացքում առաջին անգամ»,- ասել է Կացը։
Նա նշել է, որ Իսրայելի զինված ուժերն «այս փուլում կշարունակեն իրենց գործողությունները տեղում» և կունենան «շարունակական ներկայություն Լիբանանի անվտանգության գոտում՝ առանց բնակչության վերադարձի»։
ԱՄՆ-ի միջնորդությամբ ձեռք բերված համաձայնությունից հետո հրապարակված հայտարարության մեջ ասվում է, որ Իսրայելն ու Լիբանանը համաձայնել են ստեղծել «փորձնական գոտիներ, որոնցում Լիբանանի զինված ուժերը կվերահսկեն տարածքը՝ բացառելով բոլոր ոչ պետական դերակատարներին», սակայն այդ փորձնական գոտիների համար ժամանակացույց չի նշվել։
Իսրայելի կառավարությունում բոլորը չէ, որ գոհ են հրադադարի համաձայնագրից։ Ազգային անվտանգության նախարար, ծայրահեղ աջ քաղաքական գործիչ Բեն Գվիրն այն անվանել է «լուրջ սխալ»։
«Կան պահեր, երբ պետք է իմանալ, թե ինչպես «ոչ» ասել նույնիսկ Միացյալ Նահանգների նախագահին, և երբ դա չկարողանանք, հաջորդ անգամ կհանդիպենք «Հըզբոլլահ»-ին, երբ այն շատ ավելի ուժեղ և վտանգավոր կլինի»,- հայտարարել է Գվիրը:
