«Կրասնոդարի» մարզիչը հայտնել է՝ որ դեպքում ակումբը բաց կթողնի Էդուարդ Սպերցյանին

«Կրասնոդարի» գլխավոր մարզիչ Մուրադ Մուսաևը նշել է, թե որ դեպքում Հայաստանի ազգային հավաքականի կիսապաշտպան Էդուարդ Սպերցյանը կարող է հեռանալ ռուսական ակումբից։

«Չգիտես ինչու բոլորն ասում են, որ Էդիկն անպայման պետք է հեռանա այստեղից։ Բայց նա լճացման մեջ չէ, հակառակը՝ զարգանում է, ռեկորդներ է գրանցում, տիտղոս է նվաճում։ Այս մրցաշրջանը նրա համար ռեկորդային էր վիճակագրության առումով։ Երեք տարի Սպերցյանը ճանաչվել է Պրեմիեր լիգայի լավագույն կիսապաշտպան։ Կարծում եմ՝ չորրորդ անգամ ևս կճանաչվի լավագույնը։

Նա երկու տարի առաջ է սկսել նման բաներին այլ կերպ նայել։ Նա սովորեց չնյարդայնանալ, չանհանգստանալ։ Մենք շատ ենք խոսում այդ մասին, և Էդիկը հասկանում է, որ եթե լինի մեծ առաջարկ լավ ակումբից, Սերգեյ Գալիցկին, ամենայն հավանականությամբ, կընդառաջի նրան։ Եթե նման բան տեղի չունենա, նա կշարունակի պայքարել ամենաբարձր տեղերի համար Ռուսաստանում, բարելավել արդյունավետության ռեկորդներ, դա նույնպես գերազանց ուղի է։ Ես վստահ եմ, որ Էդիկը վայելում է իր կարիերայի ամեն օրն այստեղ»,- Մուրադ Մուսաևի խոսքը մեջբերում է Championat.com-ը։

Էդուարդ Սպերցյանը «Կրասնոդարի» սան է, գործող պայմանագիրը նախատեսված է մինչև 2029 թ․ հունիսի 30-ը։ Ռուսաստանի ավարտված առաջնությունում 25-ամյա կիսապաշտպանը մասնակցել էր բոլոր՝ 30 խաղերին, դարձել 13 գոլի ու 16 գոլային փոխանցման հեղինակ։ Transfermarkt-ը 25 միլիոն եվրո է գնահատում Սպերցյանի տրանսֆերային արժեքը։