Շվեդիան առաջիկա 10 ամիսների ընթացքում Ուկրաինային կփոխանցի 16 Gripen կործանիչ

Ուկրաինան և Շվեդիան ստորագրել են հռչակագիր, որը նվիրված է պաշտպանական համագործակցության խորացմանը: Բանակցություններից արդյունքում Կիևը կստանա 2,7 միլիարդ եվրոյի ռազմական օգնության փաթեթ, որից ավելի քան 2 միլիարդը կօգտագործվի անմիջապես ինքնաթիռների ձեռքբերման համար, գրում է The Insider-ը։

Ուկրաինայի նախագահ Վլադիմիր Զելենսկին մամուլի ասուլիսում հայտարարել է, որ իր երկիրը նախատեսում է ստանալ 16 JAS 39 Gripen C/D կործանիչ ինքնաթիռներ առաջիկա 10 ամիսների ընթացքում, իսկ առաջին մատակարարումները՝ դեկտեմբեր-հունվար ամիսներին։ Ինքնաթիռները զինված կլինեն Meteor հրթիռներով, որոնք կարող են հարվածել 200 կիլոմետրից ավելի հեռավորության վրա գտնվող թիրախներին։

«Այս Gripen ինքնաթիռները հագեցած են հատուկ զենքերով, մասնավորապես՝ Meteor հրթիռներով և այլ հրթիռներով, որոնք կարող են հարվածել թիրախներին 200 կիլոմետրից ավելի հեռավորության վրա: Հետևաբար, մենք կարծում ենք, որ կարող ենք դուրս մղել ռուսական ինքնաթիռներին, որոնք չեն կարողանա օգտագործել ավիացիոն ռումբեր մեծ մասշտաբով: Սա առաջին կետն է: Կան շատ այլ բաներ, որոնք ես չեմ կարող հրապարակայնորեն քննարկել: Այլ բաներ: Բայց սա շատ կարևոր կետ է»,-ասել է նա։

Ուկրաինան նախատեսում է ձեռք բերել, ընդհանուր առմամբ, 150 Gripen կործանիչ, որոնց շուրջ բանակցություններն արդեն ընթացքի մեջ են։ Դրանց թվում են E-սերիայի 22 նորագույն ինքնաթիռներ, որոնց մատակարարումը նախատեսվում է ավարտել մինչև 2030 թվականը։

Ուկրաինայի ռազմաօդային ուժերը ստացել են ինքնաթիռներ յոթ երկրներից և շահագործում են առնվազն ութ տարբեր տեսակի ինքնաթիռներ՝ խորհրդային ՄիԳ-29-ներից և Սու-25-ներից մինչև արևմտյան F-16-ներ և Mirage 2000-5-ներ։ Բաց աղբյուրների համաձայն՝ Կիևին մատակարարվել կամ խոստացվել է առնվազն 122 ինքնաթիռ։ The Insider-ի գնահատմամբ՝ աշխարհում ոչ մի այլ ռազմաօդային ուժ չունի մարտական ​​ինքնաթիռների այդքան բազմազան տեսականի։

Շվեդիան արդեն թույլատրել է Ուկրաինային օգտագործել փոխանցված զենքը Ռուսաստանի տարածքում հարվածներ հասցնելու համար 2024 թվականին։

Թարգմանությունը՝ Էմմա Չոբանյանի