Չենք պատրաստվում ինքնիշխանության հաշվին ստանդարտներին չհամապատասխանող ապրանքների արտահանմանն աջակցել․ ՏԵՍԱՆՅՈՒԹ

Ես երբեք չեմ հայտարարել Եվրասիական տնտեսական միությունից դուրս գալու մեր մտադրության մասին։ Այս մասին լրագրողների հետ ճեպազրույցի ժամանակ հայտարարեց վարչապետ Նիկոլ Փաշինյանը։

«Ես ասել եմ, որ մինչև այն կետը, քանի դեռ Եվրասիական տնտեսական միությանն անդամ լինելը և Եվրամիությանն անդամագրվելու գործընթաց սկսելու մասին օրենքի նախագծի պրոցեսները համատեղելի են, մենք այդ ճանապարհով գնալու ենք։ Դա կարող է համատեղելի լինել մինչև 2030 թիվը, դա կարող է համատեղելի լինել մինչև 2035 թիվը, դա կարող է համատեղելի լինել մինչև 2040 թիվը, դա կարող է համատեղելի լինել մինչև 2026 թվի դեկտեմբերը, դա կարող է համատեղելի լինել մինչև 2027 թվի հունիսը․ ժամանակը ցույց կտա»,-ասաց նա։

Փաշինյանի խոսքով՝ դա ինքնիշխան որոշում է։ Խոսելով Հայաստանից ՌԴ տարբեր ապրանքների ներմուծման արգելքի մասին, նա ասա․ «Եթե Ձեզ թվում է, թե նախկինում պրոբլեմներ չեն եղել, Դուք չարաչար սխալվում եք․ այդ նույն պրոբլեմները անընդհատ լինում են։ Եվ մեր բոլոր գործընկերներին ես 2018 թվականից այդ ուղերձը հղում եմ, որ բոլոր ապրանքները պետք է արտադրվեն ստանդարտներին համապատասխան։ Ցանկացած ապրանք, որ ստանդարտից դուրս է, մենք չենք պատրաստվում մեր ինքնիշխանության հաշվին ստանդարտներին չհամապատասխանող ապրանքների արտահանմանն աջակցել։ Մենք պատրաստվում ենք աջակցել բոլոր այն արտադրողներին, ովքեր ստանդարտներին համապատասխան արտադրանք են արտադրում»։

Մանրամասները՝ տեսանյութում։