ՌԴ-ից պաշտոնական նամակ չենք ստացել. ՏԿԵՆ-ը՝ «Կոմերսանտի» հրապարակման մասին

Որևէ պաշտոնական գրություն կամ նամակ Տարածքային կառավարման և ենթակառուցվածքների նախարարությունը Ռուսաստանի Դաշնությունից չի ստացել։ Այս մասին Factor TV-ին հայտնել են նախարարությունից՝ անդրադառնալով ՌԴ-ի հետ բնական գազի, նավթամթերքի և հում ադամանդի մատակարարման վերաբերյալ համաձայնագրի կասեցմանը կամ չեղարկմանը։

Հիշեցնենք՝ «Կոմերսանտն» այսօր գրել է, որ Մոսկվան այժմ անհնար է համարում նշված ապրանքների համար 2013 թվականին սահմանված անմաքս ռեժիմը և սպառնում է Երևանին երկկողմ համաձայնագրերի սառեցմամբ կամ չեղարկմամբ։ Արդյունքում, վերլուծաբանների կարծիքով, Հայաստանը կարող է ոչ միայն կորցնել ռուսական գազի և նավթամթերքի համար զեղչերի իրավունքը, այլև դժվարին իրավիճակում հայտնվել ռուսական մատակարարումների դիվերսիֆիկացիայի հարցում դժվարությունների պատճառով։

Լրատվամիջոցի փոխանցմամբ՝ Ռուսաստանը կարող է միակողմանիորեն կասեցնել կամ չեղյալ հայտարարել 2013 թվականի դեկտեմբերին հանրապետություն բնական գազի, նավթամթերքի և հում ադամանդի մատակարարման վերաբերյալ համաձայնագիրը, եթե Երևանը շարունակի ԵՄ-ին անդամակցելու գործընթացը։ Սա բխում է Ռուսաստանի էներգետիկայի նախարար Սերգեյ Ցիվիլևի՝ ՀՀ Տարածքային կառավարման և ենթակառուցվածքների նախարարությանն ուղղված նամակից («Կոմերսանտ»-ը ծանոթացել է նամակի պատճենին)։

«Եվրամիության հետ Հայաստանի փոխգործակցությունը խորացնելու ուղղությամբ շարունակվող գործնական քայլերը և ՀՀ կառավարության կողմից ԵՄ-ին անդամակցելու հայտարարված ձգտումը սպառնում են ռուս-հայկական առևտրատնտեսական և ներդրումային համագործակցության հիմնարար բարձր մակարդակի պահպանմանն ու զարգացմանը, որի հիմքերից մեկը երկկողմ միջազգային պայմանագրերն են»,- ասվում է նամակում։

Եվգենյա Համբարձումյան