Թուրքիայի ոստիկանությունը գրոհել է գլխավոր ընդդիմադիր կուսակցության գրասենյակը

Թուրքական ոստիկանությունը նախօրեին գրոհել է Անկարայում գտնվող գլխավոր ընդդիմադիր Ժողովրդահանրապետական  կուսակցության (CHP) կենտրոնական գրասենյակը՝ կուսակցության ղեկավարությանը պաշտոնանկ անելու դատարանի որոշումից հետո։ Ոստիկանությունը շենք է մտել՝ դռները կտրելով սղոցներով և քանդելով կուսակցության անդամների կողմից տեղադրված ժամանակավոր արգելապատնեշները։ Ներսում արցունքաբեր գազ և ռետինե փամփուշտներ են կիրառվել։

Կուսակցության ղեկավարությունը, անդամները և կողմնակիցները գրասենյակում են եղել մայիսի 21-ից, երբ հրապարակվել է կուսակցության նախագահ Օզգյուր Օզելին պաշտոնանկ անելու մասին դատարանի որոշումը։

Լրատվամիջոցների հաղորդագրությունների համաձայն՝ դատարանի կողմից կուսակցության առաջնորդի պաշտոնում վերականգնված Քեմալ Քըլըչդարօղլուն Օզելի հետ քննարկել է անցումային շրջանին վերաբերող հարցեր, սակայն նրանք չեն կարողացել համաձայնության գալ։ Հեռացված ղեկավարությունը հրաժարվել է լքել շտաբը, ինչից հետո Քըլըչդարօղլուն դիմել է ոստիկանություն, Անկարայի նահանգապետարանի հայտարարության մեջ։

Քըլըչդարօղլուի կողմնակիցները փորձել են ներխուժել շենք, նախքան ոստիկանությանը հրաման է տրվել միջամտել և վերահսկողություն հաստատել գրասենյակի նկատմամբ։

«Մեր հանցագործությունը CHP-ն Թուրքիայի առաջին կուսակցություն դարձնելն էր»,- միջադեպի ժամանակ գրասենյակից հրապարակված տեսանյութում ասել է Օզելը՝ նկատի ունենալով կուսակցության հաղթանակը 2024 թվականի տեղական ինքնակառավարման մարմինների ընտրություններում։

Օզելը 2023 թվականի նոյեմբերին կայացած համագումարում հաղթել էր Քըլըչդարօղլուին՝ ավարտելով նրա 14-ամյա պաշտոնավարումը։ Ընտրություններում պարտված խումբը հետագայում բողոքներ է ներկայացրել՝ պնդելով, որ պատվիրակները վարկաբեկվել են ընտրությունների ընթացքում՝ ձայների գնման և կուսակցական ներքին պաշտոնների խոստումների միջոցով։ Մայիսի 21-ին դատարանը որոշեց, որ համագումարը «բացարձակապես անվավեր» է եղել խախտումների պատճառով։

Շաբաթ Human Rights Watch միջազգային իրավապաշտպան կազմակերպությունը զգուշացրել էր, որ Թուրքիայի նախագահ Ռեջեփ Թայիփ Էրդողանի կառավարությունը խաթարում է թուրքական ժողովրդավարությունը՝ CHP-ի դեմ «դաժան մարտավարության» միջոցով։

Human Rights Watch-ը դատարանի որոշումը որակել է որպես «ևս մեկ կործանարար հարված օրենքի գերակայությանը, ժողովրդավարությանը և մարդու իրավունքներին» Թուրքիայում։

Թարգմանությունը՝ Էմմա Չոբանյանի