26.07.2026 | 23:49
ՃՏՊ՝ հրդեհի բռնկմամբ․ կան զոհեր և տուժածներ
Բանակը դարձրել են պահակային, 90%-ը պահակություն է անում, լսե՞լ եք զորավարժության մասին․ Քոչարյան․ ՏԵՍԱՆՅՈւԹ
Քաղաքականություն
24.05.2026 | 18:30
«Բանակը դարձրել են պահակային, 90%-ը պահակություն է անում»,- այս մասին ասաց «Հայաստան» դաշինքի վարչապետի թեկնածու, ՀՀ երկրորդ նախագահ Ռոբերտ Քոչարյանը՝ Էրեբունիում հրավիրված հանրահավաքի ժամանակ։
«Ե՞րբ եք լսել զորավարժությունների մասին, ոչ թե «պարադի» մասին, այլ զորավարժությունների մասին։ Քանի՞ տարի է՝ չի եղել, ոչինչ չի արվում։ Ժամանակակից բանակը չի կարող լինել պահակային բանակ»,- ասաց Քոչարյանը։
Իր ելույթում 2-րդ նախագահն անդրադարձել է երկրի արտաքին պարտքի աճին՝ հայտարարելով, որ վերջին տարիներին պարտքն ավելացել է 8 միլիարդ դոլարով, սակայն Երևանում որևէ խոշոր ծրագիր, ըստ նրա, չի իրականացվել։
Քոչարյանն անդրադրաձել է նաև անվտանգության հարցերին։ Ըստ նրա՝ «Հայաստան» դաշինքի անվտանգության մոդելը հենված է երեք հիմնասյուների վրա՝ մարտունակ բանակ, ուժեղ առաջնորդ և հզոր դաշնակից։ Նա նաև իշխանություններին մեղադրել է հզոր դաշնակցի հետ հարաբերությունները հետևողականորեն փչացնելու մեջ՝ իր հիշատակած դաշնակցի անունը սակայն չի տվել։
«Ամեն օր, հետևողական քայլերով փչացնում են հարաբերությունները այդ դաշնակցի հետ։ Ինչի՞ համար։ Որ ստեղծեն մի վիճակ՝ ասելու ձեզ, որ, ժողովո՛ւրդ ջան, ելք չունենք, մենակ ենք, ոչ ոք մեր կողքին կանգնած չի, խեղճ ենք, ուրեմն՝ պետք է ենթարկվենք բոլոր պահանջներին։ Ուրիշ բացատրություն այս ամենը չունի։ Միայն թշնամին կարող է առաջնորդել երկիրը այս տարբերակով»,- նշեց Ռոբերտ Քոչարյանը։
Մանրամասները՝ տեսանյութում։
Անի Թամրազյան
