Ռոսպոտրեբնադզորը կասեցրել է հայկական որոշ գինիների և կոնյակների վաճառքը Ռուսաստանում

Ռոսպոտրեբնադզորը հայտարարել է, որ Հայաստանի երեք արտադրողների որոշ գինիներ և կոնյակներ ճանաչվել են պարտադիր պահանջներին չհամապատասխանող։ Գերատեսչությունը կարգադրել է դադարեցնել դրանց վաճառքը և դուրս բերել շրջանառությունից Ռուսաստանի տարածքում։

«Ռոսպոտրեբնադզորը վերահսկում է շրջանառության մեջ գտնվող ապրանքները, այդ թվում՝ ալկոհոլային խմիչքները։

Միջոցառումների արդյունքում «ՎԵԴԻ-ԱԼԿՈ» ՓԲԸ-ի, «ԱԲՈՎՅԱՆԻ ԿՈՆՅԱԿԻ ԳՈՐԾԱՐԱՆ» ՍՊԸ-ի և «Շահնազարյան գինու և կոնյակի տուն» ՍՊԸ-ի (ՀՀ) կողմից արտադրված ապրանքները ճանաչվել են որպես պարտադիր պահանջներին չհամապատասխանող՝ «ԳԵՏԱՓ ՎԵՐՆԱՇԵՆ» սովորական կարմիր կիսաչոր գինի (11% սպիրտ, 0.75 լ, շշալցումը՝ 03.02.2025) և «ՎԵԴԻ ԱԼԿՈ» ԽԱՐՋԻ սովորական սպիտակ չոր գինի, T3 «ԱՐՆԻ ԼԵԳԵՆԴՍ» (12% սպիրտ, 0.75 լ, շշալցումը՝ 17.12.2024), որոնք արտադրվել են «ՎԵԴԻ-ԱԼԿՈ» ՓԲԸ-ի կողմից։

Անորակ ապրանքների ցանկում է նաև «Հայկական կոնյակ 5 աստղ» հնգամյա սովորական կոնյակը (40% ալկոհոլային պարունակություն, 0.5 լ, շշալցման ամսաթիվը՝ 2025 թվականի հունվարի 20-ին), որը արտադրվել է «ԱԲՈՎՅԱՆԻ ԿՈՆՅԱԿԻ ԳՈՐԾԱՐԱՆ» ՍՊԸ-ի կողմից (Աբովյան, Հայաստանի Հանրապետություն):

Ավելին, անհամապատասխանություն է հայտնաբերվել «ԿՎ» յոթամյա հայկական կոնյակի՝ «ՇԱԽՆԱԶԱՐՅԱՆ XO»-ի (40% ալկոհոլային պարունակություն, 0.5 լ, շշալցման ամսաթիվը՝ 2025 թվականի մայիսի 16-ին), որը արտադրվել է «Շահնազարյանի գինու և կոնյակի տուն» ՍՊԸ-ի կողմից (Եղվարդ, Հայաստանի Հանրապետություն):

Պարտադիր պահանջներին չհամապատասխանող ապրանքների վաճառքը կանխելու համար մանրածախ առևտրականներին և ներմուծողներին տեղեկացվել է վաճառքի կասեցման և անորակ ալկոհոլային խմիչքների շրջանառությունից դուրսբերման մասին»,- ասված է Ռոսպոտրեբնադզորի կայքում զետեղված հաղորդագրությունում։

Հիշեցնենք, որ «Ռոսսելխոզնադզորը» մայիսի 22-ից ժամանակավոր սահմանափակումներ է մտցրել Հայաստանից ծաղիկների ներմուծման վրա։

Ապա նաև հայտարարվեց, որ Ռուսաստանը ժամանակավորապես արգելել է «Ջերմուկ» հանքային ջրի ներմուծումն ու վաճառքը։

Թարգմանությունը՝ Անահիտ Խաչատրյանի