«ՀՀ-ին արտաքին ուղեցույցներ պարտադրելու արշավ»․ ՌԴ ԱԳՆ-ն արձագանքել է The Insider-ի հետաքննությանը

Ռուսաստանի ԱԳՆ-ն արձագանքել է The Insider-ի հետաքննությանը։ ՌԴ արտաքին գերատեսչության հայտարարության մեջ, որը  տարածել է ՏԱՍՍ-ը , պնդում է արվում, թե The Insider-ը «օտարերկրյա գործակալ հրատարակություն» է։

«Բռնել «Մորուքից», ФСБ-ի, ГРУ-ի և СВР-ի  ինչ գործակալներ են ուղարկվել Հայաստան՝ Փաշինյանի դեմ պայքարելու համար»  հետաքննության մեջ ներկայացված փաստարկները ՌԴ ԱԳՆ-ի դիտարկմամբ «ոչ այլ ինչ են, քան բացահայտ ստեր և կազմակերպված սադրանք, որոնք նպատակ ունեն հոգեբանական ճնշում գործադրել ռուս դիվանագետների վրա և վախեցնել հայ հասարակությանը ընտրություններից առաջ»։

«Այս կեղծ լուրի հեղինակները, ովքեր, ըստ երևույթին, այդքան ուշադիր ուսումնասիրել են դիվանագիտական ​​​​առաքելության աշխատակիցների կենսագրական տվյալները, նույնիսկ չեն էլ փորձել կրկնակի ստուգել տեղեկատվությունը, թույլ տալով բազմաթիվ փաստական ​​​​սխալներ և անճշտություններ, ինչը միայն հաստատում է հեղինակների «պրոֆեսիոնալիզմի» և տարրական գրագիտության մակարդակը», – պնդում է է ՌԴ Արտաքին գործերի նախարարությունը։ Ըստ Մոսկվայի՝ «The Insider-ը չի կարողանում ներկայացնել որևէ համոզիչ փաստ՝ մեղադրանքները հիմնավորելու համար։

«Սա «մոլդովական սցենարի» հստակ պրոյեկցիան է Հայաստանի վրա՝ ստեղծելով թշնամական, թունավոր մթնոլորտ Ռուսաստանի շուրջ և մաքրելով տեղական տեղեկատվական տարածքը մեր երկրին վերաբերող ամեն ինչից։ Մենք «Երևանում ռուս գործակալների» մասին վերջին «սենսացիան» դիտարկում ենք որպես Ռուսաստանին Հարավային Կովկասից դուրս մղելու և Հայաստանին արտաքին ուղեցույցներ պարտադրելու արշավի ևս մեկ դրվագ, որը հակասում է նրա սեփական ազգային շահերին», –  ասվում է հայտարարությունում։

ՀՀ խորհրդարանական ընտրություններից առաջ ռուսական The Insider-ի հրապարակած ծավալուն հետաքննության մեջ անվանական ներկայացված են Կրեմլի «հայկական ուղղությունը» համակարգող պաշտոնյաներն ու հատուկ ծառայությունների աշխատակից «դիվանագետները»։ Հոդվածում հիշատակվում են նաև «Ուժեղ Հայաստանի» առաջնորդ Սամվել Կարապետյանը, ԲՀԿ նախագահ Գագիկ Ծառուկյանը և ՀՀ Արտաքին հետախուզական ծառայության ղեկավար Քրիստիննե Գրիգորյանը։

Աշխատանքի վայրը՝ «ФСБ-ի տեղեկատվական կենտրոն». ըստ պարբերականի հրապարակած փաստաթղթի՝ այսպիսի նշում է առկա «Ուժեղ Հայաստան» դաշինքի առաջնորդ Սամվել Կարապետյանի անձնագրային գործում։

Էմմա Չոբանյան