16.08.2026 | 23:19
Ըմբիշներ Սամվել Տերտերյանը և Յուրիկ Պետրոսյանը դուրս են եկել Մ-20 ԱԱ-ի եզրափակիչ. ՏԵՍԱՆՅՈՒԹ
Ռուսաստանը և Բելառուսն անմիջական պատասխանատվություն են կրում. Ուրսուլա ֆոն դեր Լեյենը՝ Լիտվայում ԱԹՍ-ի միջադեպի մասին
Քաղաքականություն
20.05.2026 | 23:21
Լիտվայում օդային հարձակման մասին տագնապի հայտարարումից հետո, Եվրահանձնաժողովի նախագահ Ուրսուլա ֆոն դեր Լեյենը հայտարարել է, որ Ռուսաստանը և Բելառուսն անմիջական պատասխանատվություն են կրում ԵՄ երկրներ անօդաչու թռչող սարքերի ներխուժումների համար։
«Ռուսաստանի հրապարակային սպառնալիքները Բալթյան երկրների դեմ բացարձակապես անընդունելի են։ Թող կասկած չլինի։ Մեկ անդամ պետության դեմ սպառնալիքը սպառնալիք է մեր ամբողջ Միության դեմ։ Ռուսաստանը և Բելառուսը անմիջական պատասխանատվություն են կրում մեր արևելյան թևում մարդկանց կյանքն ու անվտանգությունը վտանգող անօդաչու թռչող սարքերի համար»,- գրել է ֆոն դեր Լեյենը X-ի միկրոբլոգում։
Նա նշել է, որ Եվրոպան կարձագանքի միասնությամբ և ուժով․ «Մենք կշարունակենք ամրապնդել մեր արևելյան թևի անվտանգությունը՝ ուժեղ կոլեկտիվ պաշտպանությամբ և պատրաստվածությամբ բոլոր մակարդակներում»։
Միաժամանակ, լիտվացի զինվորականները հայտնել են, որ Բելառուսը զգուշացրել է իրենց անօդաչու թռչող սարքի մասին։ Ըստ LRT-ի՝ այս մասին լրագրողներին ասել է Լիտվայի բանակի ցամաքային զորքերի հրամանատար Ներիուս Ստանկյավիչյուսը։
«Այսօր առավոտյան մենք հաղորդագրություն ստացանք Բելառուսի զինված ուժերից Լիտվայի տարածք անօդաչու թռչող սարքերի հնարավոր տեղաշարժի մասին։ Նմանատիպ տեղեկատվություն են ստացել նաև մեր հարևանները Լատվիայում»,- ասել է նա։
Ստանկյավիչյուսը նաև պարզաբանել է, որ դեռևս որևէ տեղեկություն չունի անօդաչուի ճակատագրի մասին։
«Մենք ներկայում չենք կարողանում որոշել այդ թռչող սարքի գտնվելու վայրը՝ այն վթարի՞ է ենթարկվել, թե՞ պարզապես լքել է Լիտվայի օդային տարածքը։ Որոնողական աշխատանքները շարունակվում են ՌՕՈՒ ուղղաթիռի և ցամաքային ուժերի օգնությամբ»,- հայտարարել է զինվորականը։
Թարգմանությունը՝ Էմմա Չոբանյանի
