Լիտվայում ԱԹՍ-ների պատճառով տագնապի կարմիր մակարդակ է հայտարարվել. երկրի ղեկավարությունը տեղափոխվել է ապաստարաններ

Լիտվայի Պաշտպանության նախարարությունը մայիսի 20-ի առավոտյան նախազգուշացում է տարածել անօդաչու թռչող սարքի մասին: Տագնապի «դեղին» մակարդակ է հայտարարվել, ինչը նշանակում է, որ հարձակումը հավանական է, բայց ոչ ամենաբարձր՝ «կարմիր» մակարդակի։ Զգուշացումը հայտարարվել է երկրի արևելքում գտնվող չորս շրջաններում՝ Բելառուսի հետ սահմանին մոտ, ապա՝ Վիլնյուսի շրջանում, նշում է BBC-ի  ռուսական ծառայությունը։

Զինվորականների հայտարարության համաձայն՝ տագնապը գործարկվել է «ռադարի ազդանշանի պատճառով, որը բնութագրվում է անօդաչու թռչող սարքի (ԱԹՍ) բնորոշ գծերով, այն հայտնաբերվել Բելառուսի տարածքում՝ Լիտվայի սահմանի մոտ»։ Լիտվան օդ է բարձրացրել կործանիչներ։

BBC-ն նշում է, որ «դեղին» տագնապից հետո Լիտվայի զինված ուժերը հայտարարել են տագնապի «կարմիր» մակարդակ։

Ազգային ճգնաժամային կառավարման կենտրոնը (NKVC) ընդգծել է, որ դպրոցներն ու մանկապարտեզները պարտավոր են երեխաներին տեղափոխել ապաստարաններ։

Delfi-ի հաղորդմամբ՝ Վիլնյուսի օդանավակայանը փակվել է, երթևեկությունը դադարեցված է։ Delfi-ի տվյալներով՝  բարձրաստիճան պաշտոնյաները՝ Լիտվայի նախագահ Գիտանաս Նաուսեդան, վարչապետ Ինգա Ռուգինիենեն և Սեյմի խոսնակ Յուոզաս Օլեկասը, ապաստարաններում են եղել։

Տագնապի հայտարարումից 15 րոպե անց բնակիչներին տեղեկացվել է, որ կարող են լքել ապաստարանները։

Վերջին մի քանի ամիսների ընթացքում անօդաչու թռչող սարքերը բազմիցս մտել են Լատվիայի, Լիտվայի, Էստոնիայի և Ֆինլանդիայի օդային տարածք: Բալթյան երկրների իշխանությունների տվյալներով՝ խոսքն ուկրաինական անօդաչու թռչող սարքերի մասին է, որոնք կորցրել են կողմնորոշումը ռուսական ռադիոէլեկտրոնային համակարգերի պատճառով: Ռուսաստանն իր հերթին մեղադրում է Բալթյան երկրներին ուկրաինական անօդաչուներին իրենց օդային տարածքի վրայով թռչելու թույլտվություն տրամադրելու համար։

Մայիսի 19-ին ՆԱՏՕ-ի ռազմաօդային ուժերն Էստոնիայում խոցել էին Ռուսաստանից ներխուժած անօդաչու թռչող սարք։

Թարգմանությունը՝ Էմմա Չոբանյանի