Պնդում եմ՝ Նարեկ Կարապետյանը միայն ՀՀ քաղաքացի է․ Գոհար Մելոյան

«Պնդում եմ, որ Նարեկ Կարապետյանը միայն ՀՀ քաղաքացի է, ցավում եմ, որ իրավապահ մարմինները ստիպված են սպասարկել քաղաքական այս բացահայտ ֆեյք օրակարգը»,- այս մասին Factor.am-ի հետ զրույցում ասաց «Ուժեղ Հայաստան» դաշինքի ընտրական ցուցակի պատգամավորի թեկնածու Գոհար Մելոյանը։

Առավոտյան Քննչական կոմիտեն հայտնեց, թե «Ուժեղ Հայաստան» դաշինքի ցուցակի առաջին համար Նարեկ Կարապետյանը թաքցրել է օտար պետության քաղաքացիություն ունենալու մասին տեղեկությունը, ինչի հիմքով ՀՀ ՆԳՆ-ն հանցագործության մասին հաղորդում է ներկայացրել ՔԿ։

Ըստ նախաքննական մարմնի` հաղորդման հիման վրա նախաձեռնվել է քրեական վարույթ՝ Քրեական օրենսգրքի 449-րդ հոդվածի 1-ին մասով (պաշտոնատար անձի կարգավիճակ ձեռք բերելուն կամ պահպանելուն խոչընդոտող տեղեկությունները թաքցնելը):

Գոհար Մելոյանը այս տեղեկությունները որակեց որպես իշխանությունների կողմից հրահրված կեղծ օրակարգ։

«Այստեղ տարրական տրամաբանություն է պետք, մենք այն քաղաքական ուժն ենք, որ մեր թեկնածուն Սամվել Կարապետյանն է, և իր դեպքում կար խոչընդոտ։ Մենք բարձրաձայնել ենք դա, և մեր թղթաբանությունը իրականացրել ենք ծայրաստիճան նրբանկատորեն, իրավունքի և օրենքի տրամաբանության շրջանակներում, ու որևէ կերպ այդ ցուցակը առաջնորդողը չէր կարող խնդիր ունենալ ցենզերի հետ»,- ասաց Մելոյանը։

Նրա կարծիքով՝ իրավապահները պետք է հիմնավոր ապացուցեին իրենց պնդումները և պահեն անմեղության կանխավարկածը։ Գոհար Մելոյանի պնդմամբ՝ այս ցնցումները նպատակ ունեն հանրության ուշադրությունը շեղել Նիկոլ Փաշինյանի գործունեության վտանգավոր դրսևորումներից։

«Մեր քաղաքական ուժը համոզմունք է արտահայտում, որ այս ցնցումները պայմանավորված են Նիկոլ Փաշինյանի բացթողումները կոծկելու անհրաժեշտությամբ՝ կնոջ վրա հարձակումը, ատելության խոսքը, քաշքշուկները և սպառնալիքները», – նշել է Մելոյանը՝ հավելելով, որ դրանք Քրեական օրենսգրքի հոդվածների «բույլ» են կազմում:

«Ուժեղ Հայաստան» կուսակցության ընտրացուցակի առաջին համար Նարեկ Կարապետյանը ևս պնդում է, որ նա միայն ՀՀ քաղաքացի է։

Հիշեցնենք` Նարեկ Կարապետյանի՝ ՌԴ քաղաքացի լինելու մասին տեղեկությունը շրջանառեց ԱԺ նախագահ Ալեն Սիմոնյանը։ Նա մի սքրինշոթ էր հրապարակել և գրել․ «Նարեկ Կարապետյանը ՌԴ քաղաքացի՞ է»: Գրառմանը կից փաստաթղթում իրավաբանական անձի տվյալներ են, դրանում Նարեկ Կարապետյան անվան դիմաց գրված է՝ ՌԴ քաղաքացի:

Նարեկ Կարապետյանը գրառումից կարճ ժամանակ անց արձագանքեց․ «Ալեն Ռոբերտովիչ, այդպիսի բաներ մի՛ արեք։ Ես Ռուսաստանի քաղաքացի չեմ, բացի ՀՀ քաղաքացիությունից ուրիշ քաղաքացիություն չեմ ունեցել, կյանքում Ռուսաստանում ավելի քիչ եմ ապրել, քան Անգլիայում կամ Շվեյցարիայում»։

Factor.am-ը երեկ դիմել էր նաև ԿԸՀ, որտեղից Նարեկ Կարապետյանի այլ պետության քաղաքացիություն ունենալու վերաբերյալ հայտնել էին. «ԿԸՀ կայքում հասանելի է ընտրություններին մասնակից բոլոր ուժերի ընտրական ցուցակների մասին տեղեկատվությունը։ Բոլոր այն թեկնածուները, որոնք գրանցված են ԿԸՀ կողմից, նշանակում է, որ ԿԸՀ-ն նախապես ստուգել է տվյալ անձանց վերաբերելի փաստաթղթերը՝ այդ թվում վերջին չորս տարում ՀՀ -ում մշտական բնակության և ՀՀ քաղաքացի լինելը փաստող փաստաթղթերը։ Այդ փաստաթղթերը թեկնածուներին տրամադրվում են ՆԳՆ Միգրացիայի և քաղաքացիության ծառայության կողմից և փոխանցվել են ԿԸՀ»,- նշել էր խոսնակը։

Անի Թամրազյան