Գիտնականներն առաջին անգամ արհեստական ստեղծված ձվից ճուտիկ են դուրս բերել

Ամերիկյան Colossal Biosciences կենսատեխնոլոգիական ընկերությունը հայտարարել է առաջին անգամ ամբողջովին արհեստական ​​ձվից ճուտիկի հաջող դուրս գալու մասին: Գիտնականները ստեղծել են հատուկ պարկուճ՝ եռաչափ տպիչով տպված կճեպով և բիոինժեներիայով մշակված թաղանթով, որը սաղմին մատակարարում է թթվածին և պաշտպանում այն ​​ճիշտ այնպես, ինչպես բնական կճեպը, գրում է DW-ի ռուսական ծառայությունը:

Մշակողների խոսքով՝ այս տեխնոլոգիան կարող է նշանակալի քայլ լինել հազվագյուտ թռչունների պահպանման և նույնիսկ անհետացած տեսակների վերականգնման գործում:

Նախագիծը սկզբնապես մտածվել է մինչև 3,5 մետր հասակ ունեցող անհետացած նորզելանդական թռչնի՝ հսկա մոայի հնարավոր վերածննդի համար: Նրա ձվերի հսկայական չափերի պատճառով բնության մեջ համապատասխան փոխարինող գոյություն չունի, ուստի հետազոտողները ստիպված են եղել մշակել բոլորովին նոր ինկուբացիոն համակարգ:

Ընկերության գործադիր տնօրեն Բեն Լամը նշել է, որ թիմը «ոչ միայն վերարտադրել է ձվաբջիջը, այլև ձևավորել է այն զրոյից», սա անվանելով բիոինժեներիայի «կարևոր նվաճում»:

Փորձագետները նշում են, որ արհեստական ​​ձվի կճեպի ստեղծումը չափազանց բարդ խնդիր է, քանի որ այն պետք է միաժամանակ պաշտպանի սաղմը և ապահովի ճշգրիտ գազափոխանակություն: Ընկերությունը հայտնել է, որ առաջին սաղմերը զարգացել են արհեստական ​​ձվի ներսում մի քանի շաբաթ, որից հետո հաջողությամբ դուրս են եկել ձվից: Այլ երկրների գիտնականներն արդեն արդյունքները տպավորիչ են անվանել, չնայած նրանք ընդգծել են ուսումնասիրության անկախ գիտական ​​ստուգման և փորձագիտական ​​​​գնահատման անհրաժեշտությունը:

Թարգմանությունը՝ Էմմա Չոբանյանի