Էստոնիան առաջին անգամ խոցել է երկրի օդային տարածք մտած ուկրաինական ԱԹՍ-ն

Մայիսի 19-ի առավոտյան Էստոնիայի օդային տարածքում անօդաչու թռչող սարք է հայտնաբերվել։ Այն խոցվել է ՀՕՊ ուժերի կողմից Վիրտսյարվ լճի վրա, Delfi-ին ասել է պաշտպանության նախարար Հաննո Պևկուրը, փոխանցում է Meduza-ն։

«Սա առաջին դեպքն է, երբ մենք ինքներս ենք անօդաչու թռչող սարք խոցում»,- ընդգծել է նա։

Պևկուրի խոսքով՝ նախնական տեղեկությունների համաձայն՝ անօդաչուն ուկրաինական է եղել և ուղղվում էր դեպի Ռուսաստանում գտնվող թիրախները։ Ռազմաօդային ուժերն ու ոստիկանությունը հետաքննում են միջադեպի մանրամասները։

Երկրի պաշտպանության նախարարությունը կեսօրին Էստոնիայի հարավում անօդաչու թռչող սարքի վտանգի տագնապ է հայտարարել։ Այն չեղարկվել է շուրջ մեկ ժամ անց։

Էստոնիայի օդային տարածքում անօդաչու թռչող սարքի պատճառով, ըստ Flightradar24-ի տվյալների, Շվեդիայի ռազմաօդային ուժերի կործանիչներն օդ են բարձրացել։

Վերջին մի քանի ամիսների ընթացքում անօդաչու թռչող սարքերը բազմիցս մտել են Լատվիայի, Լիտվայի, Էստոնիայի և Ֆինլանդիայի օդային տարածք: Բալթյան երկրների իշխանությունների տվյալներով՝ խոսքն ուկրաինական անօդաչու թռչող սարքերի մասին է, որոնք կորցրել են կողմնորոշումը ռուսական ռադիոէլեկտրոնային համակարգերի պատճառով: Ռուսաստանն իր հերթին մեղադրում է Բալթյան երկրներին ուկրաինական անօդաչուներին իրենց օդային տարածքի վրայով թռչելու թույլտվություն տրամադրելու համար։

Հավելենք, որ Լատվիայի օդային տարածք թռչող անօդաչուները կառավարական ճգնաժամի և կառավարության հրաժարականի պատճառ են դարձել։

Թարգմանությունը՝ Էմմա Չոբանյանի