Հայաստան-Թուրքիա սահմանը պետք չէ դարձնել երկնային Երուսաղեմի դարպասները․ Մարուքյան․ ՏԵՍԱՆՅՈՒԹ

«Լուսավոր Հայաստան» կուսակցությունը քարոզարշավ է իրականացնում հայ-թուրքական սահմանին գտնվող Մարգարա գյուղում։

«Մենք գտնվում ենք Հայաստան-Թուրքիա սահմանին՝ Մարգարա համայնքում, որն արդեն խոշորացված համայնք է։ Եվ ուզում ենք այստեղից ուղերձ հղել բոլոր այն մարդկանց, ովքեր որ որոշակի մտահոգություններ ունեն Հայաստան-Թուրքիա սահմանի բացման վերաբերյալ։ Նախ՝ ուզում ենք ասել, որ Հայաստան-Թուրքիա սահմանը պետք չէ դարձնել, ինչպես Կարպիս Փաշայանն է ասում, երկնային Երուսաղեմի դարպասները։ Մեր հարևան պետությունն է։ Մենք հասկանում ենք, որ վաղ թե ուշ սահմանները պետք է բացվեն։ Մենք գիտենք բոլորս, որ սահմանը Հայաստանի Հանրապետությունը չի փակել։ Մենք գիտենք բոլորս, որ Հայաստանի Հանրապետությունն ինչ կարող էր՝ արել է վերջին տարիներին, որպեսզի այս սահմանը բացվի, սակայն այն չի բացվել։ Եվ մենք արդեն հստակ գիտենք, որ հայ-թուրքական հարաբերությունները պայմանավորված են Հայաստան-Ադրբեջան հարաբերություններից, և Ադրբեջանի պահանջները չեն վերջանում, անդադար այդ պայմաններն ավելանում են, և այս սահմանն էլ չի բացվում»,- ասաց Մարուքյանը։

Նա նաև ասաց, որ մինչև  սահմանի ֆիզիկական բացումը պատրաստվում են Ազգային ժողովում ներկայացնել օրենսդրական փաթեթ, որով բազմաթիվ հարցերում պաշտպանելու են ՀՀ քաղաքացուն, Հայաստանի տնտեսությունը, Հայաստանի անշարժ գույքի շուկան, Հայաստանի ռազմավարական օբյեկտները, արժեթղթերը, բաժնետոմսերը։

Մանրամասները՝ տեսանյութում։