Ալիևի հետ պայմանավորվեք, գրավոր տպեք, ցույց տվեք, որն է խաղաղությունը. Գագիկ Ծառուկյան․ ՏԵՍԱՆՅՈՒԹ

Գագիկ Ծառուկյանը հայտարարել է, որ Հայաստանի համար անհրաժեշտ է ոչ թե բանավոր պայմանավորվածություններով, այլ միջազգային հստակ երաշխիքներով ամրագրված խաղաղություն։ Նրա խոսքով՝ եթե խոսվում է խաղաղության հաստատման մասին, ապա հանրությանը պետք է ներկայացվի ստորագրված փաստաթուղթ, որը կապահովի պատերազմի բացառումը։

Ծառուկյանը նշել է, որ խաղաղության համաձայնագիրը պետք է երաշխավորվի հզոր պետությունների կողմից՝ օրինակ բերելով Չինաստանին, Ռուսաստանին, Հնդկաստանին և Պակիստանին։ Նրա կարծիքով՝ պայմանագիրը խախտող կողմի նկատմամբ պետք է կիրառվեն պատժամիջոցներ՝ տարածքային կամ ֆինանսական պատասխանատվության տեսքով։

Նա ընդգծել է, որ առանց նման երաշխիքների խաղաղությունը կարող է վերածվել շանտաժի գործիքի՝ նշելով, որ Ադրբեջանը շարունակաբար նոր պահանջներ է առաջ քաշում։ Ծառուկյանի խոսքով՝ Ադրբեջանը չի կարող լինել Հայաստանի վստահելի գործընկերը, և Հայաստանը պետք է լինի ուժեղ ու կարողանա ինքնուրույն պաշտպանել իր շահերը։

Անդրադառնալով ներքաղաքական իրավիճակին՝ նա քաղաքացիներին կոչ է արել ակտիվ մասնակցել ընտրություններին՝ շեշտելով, որ երկրի ապագան որոշողը ժողովուրդն է։ Ծառուկյանը նշել է, որ միայն բարեգործությամբ հնարավոր չէ երկիր կառուցել և անհրաժեշտ է համախմբվածություն ու միասնական աշխատանք։

Նա նաև ընդգծել է Սփյուռքի ներուժի կարևորությունը՝ նշելով, որ աշխարհում կան բազմաթիվ ազդեցիկ ու հաջողակ հայեր, որոնց հետ Հայաստանը պետք է կարողանա վերականգնել կապն ու համագործակցությունը։

Մանրամասները՝ տեսանյութում։

Նարեկ Կիրակոսյան