Կարապետյանը հորեղբոր՝ «դպրոց կառուցողներն ու ասֆալտ անողներն ուղեղ չունեն» արտահայտության մասին․ ՏԵՍԱՆՅՈՒԹ

«Ուժեղ Հայաստան» կուսակցության առաջին համար Նարեկ Կարապետյանը Factor TV-ի հարցին ի պատասխան մեկնաբանեց հորեղբոր՝ Սամվել Կարապետյանի՝ դպրոցաշինության և ասֆալտապատման վերաբերյալ երեկ հնչեցրած աղմկահարույց հայտարարությունը։ Վերջինը երեկ Գեղարքունիքի մարզի բնակիչների հետ հանդիպմանը ասել էր։

«Սրանց համար մարդը գոյություն չունի, սրանց համար իրենց աթոռը, իրենց պարգևավճարները, իրենց գրդոնը… Դուք որ ասում եք՝ խի են շատ դպրոց կառուցում կամ ասֆալտ․․․որովհետև ուղեղ չունեն, էդ որ ցույց են տալիս, դրա համար»,- ասել էր Կարապետյանը։
Մեր այն հարցին՝ արդյոք «նա, ով դպրոց է կառուցում և ասֆալտ է փռում, ուղեղ չունի՞», նրա եղբորորդին՝ Նարեկ Կարապետյանն ասաց, որ պետության կապիտալ ծախսերը, նախևառաջ, պետք է ուղղվեն աշխատատեղերի ստեղծմանն ու կրթության ոլորտի մասնագետների աշխատավարձերի բարձրացմանը։

Մեր դիտարկմանը, որ դպրոց պետք է կառուցեն, որպեսզի երեխաները կրթություն ստանան, արձագանքեց։
«Պետք է մանկավարժների աշխատավարձերի վերանայում անենք։ Մանկավարժները պետք է լուրջ աշխատավարձեր ստանան՝ ոչ միայն ատեստավորման շրջանակներում, այլև ընդհանրապես։ Միայն դրանից հետո որակական առումով հնարավորություն կունենանք փոխել կրթական, ծրագրային համակարգը։ Երկրորդը՝ կապիտալ ծախսեր համայնքներում. այս կապիտալ ծախսերը պետք է ուղղվեն արտադրությունների, աշխատատեղերի ստեղծման վրա, որպեսզի մարդիկ ապրուստ ունենան»,- ասաց Կարապետյանը։
Նա որպես օրինակ մատնանշեց Տավուշի մարզը՝ ասելով, որ Բերդում և Նոյեմբերյանում գործազրկությունը մեծ խնդիր է, և պետությունը պետք է ներդրումներ կատարի գործարանների ու արտադրությունների ստեղծման ուղղությամբ։

Մեր դիտարկմանը, թե դպրոցներն ու ասֆալտապատումն էլ են աշխատատեղեր ապահովում, Կարապետյանը պատասխանեց, որ ասֆալտապատումը «ցիկլային» աշխատանք է, մինչդեռ անհրաժեշտ են երկարաժամկետ զբաղվածություն ապահովող աշխատատեղեր։

«Մենք պետք է երկարաժամկետ աշխատատեղ ստեղծենք, որ մարդիկ տարիներով աշխատեն, չլքեն իրենց հայրենիքը»,- ասաց նա։
Կարապետյանը միաժամանակ նշեց, որ ենթակառուցվածքային ծրագրերը նույնպես կարևոր են։

«Այստեղ էլ է շատ ասֆալտ արվելու, բայց մենք պետք է մեր ուշադրությունը կենտրոնացնենք մարդկանց գործ ապահովելու վրա։ Մարդը պետք է հայրենիքում լավ վարձատրվող գործ ունենա»,- եզրափակեց նա։

Մանրամասները՝ տեսանյութում։

Արփի Հակոբյան