Խաղաղություն խոսք տվողից մինչև Նախիջևան խոսք տվող՝ ջուր ծեծող են. Գևորգյան․ ՏԵՍԱՆՅՈՒԹ

«Բոլոր քաղաքական ուժերին՝ ասում եմ՝ խաղաղություն խոսք տվողից մինչև Նախիջևան խոսք տվող, բոլորը ջուր ծեծող են»,- այս մասին ասաց «Բոլորին դեմ եմ» ժողովրդավարական կուսակցության ցուցակի երկրորդ համար Իշխան Գևորգյանը։

Կուսակցության անդամներն այսօր Կարապի լճի մոտ ակցիա էին իրականացնում։

Գևորգյանի խոսքով՝ իրենք ընտրություններին մասնակցող բոլոր ուժերին դիտարկում են որպես սուպերվարչապետական համակարգի մաս։

«Այս կանոններով հաղթողը դառնալու է սուպերվարչապետ, որի միանձնյա հրամանով կարող են հարցեր որոշվել, իսկ ընդդիմությունն էլ, ըստ մեզ, ոչ մի դրական փոփոխություն չի բերի», – ասաց Գևորգյանը։

Անդրադառնալով «ձայների փոշիացման» վերաբերյալ մտահոգություններին՝ Գևորգյանը նշեց, որ իրենց ուժը հավակնում է ոչ թե ավանդական ընտրողների, այլ նրանց, ովքեր դեմ են բոլորին և չեն մասնակցում ընտրություններին։

«Մենք հավակնում ենք հենց այն քաղաքացիների ձայներին, ովքեր բոլորին դեմ են։ Մենք վստահ ենք, որ այդ մարդիկ անցողիկ շեմից շատ են», – շեշտեց նա։

Պատասխանելով այն դիտարկմանը, որ իրենց քայլերը կարող են անլուրջ թվալ, Գևորգյանը վստահեցրեց, որ իրենց գործողությունները լուրջ հիմքեր ունեն։ Նա հայտնեց, որ իրենց նպատակն է խորհրդարանում ապահովել այնպիսի պատկեր, որ որևէ ուժ չկարողանա ստանալ 50%-ից ավելին և կառավարել միանձնյա։

«Մենք ներկայացնում ենք «բոլորին դեմ» քաղաքացիներին։ Եթե չկարողանանք ստիպել համակարգի փոփոխություն և հարյուրօրյա ծրագրի իրականացում, մենք կհեռանանք խորհրդարանից և պայքարը կշարունակենք քաղաքացիների հետ միասին», – ասաց Գևորգյանը։

Մանրամասները՝ տեսանյութում։

Անի Թամազյան