02.07.2026 | 02:50
ԱԱ-2026. Բելգիան կամային հաղթանակ տարավ 0:2-ից հետո. ՏԵՍԱՆՅՈՒԹ
Հայաստանն արել է ավելին, քան ակնկալվում էր ԵՄ վիզաների ազատականացման այս փուլում. Արփինե Սարգսյան
Քաղաքականություն
12.05.2026 | 22:39
Հայաստանն աշխարհում միակ պետությունն է, որի հետ Եվրամիությունն այժմ ակտիվորեն գործընթաց է իրականացնում վիզաների ազատականացման շուրջ։ Այս մասին ՀՀ քաղաքացիներին ուղղված իր տեսաուղերձում հայտարարել է ՀՀ Ներքին գործերի նախարար Արփինե Սարգսյանը՝ արձանագրելով, որ այս ուղղությամբ կա պատմական առաջընթաց։
Ընդգծելով հարցի նկատմամբ հանրային մեծ սպասումը՝ նախարարը վստահեցրել է, որ յուրաքանչյուր զարգացման մասին տեղեկատվությունը տրամադրվելու է բաց և թափանցիկ։ Նա հիշեցրել է, որ երկխոսության պաշտոնական մեկնարկից հետո Եվրոպական միությունը ռեկորդային սեղմ ժամկետում փոխանցել է գործողությունների ծրագիրը, իսկ օրերս արդեն ներկայացվել է առաջընթացի առաջին զեկույցը:
«Մի շարք ուղղություններով Հայաստանը գրանցել է առաջանցիկ տեմպեր։ Այսինքն՝ արել ենք ավելին, քան նույնիսկ ակնկալվում էր այս փուլում: Հայաստանյան ջանքերը բարձր է գնահատել նաև Եվրոպական հանձնաժողովի նախագահը՝ վստահություն հայտնելով, որ հասնելու ենք մեր նպատակին»,- նշել է Արփինե Սարգսյանը։
Որպես հայկական կողմի բանակցող՝ ՆԳ նախարարը շեշտել է, որ այս գործընթացը միայն ճամփորդելու մասին չէ. այն նոր հնարավորությունների և Եվրոպային ավելի մոտ գտնվելու խորհուրդն ունի։
«Վստահեցնում եմ, որ շարունակելու ենք հետևողական աշխատանքը՝ հստակ քայլերով առաջ շարժվելով դեպի առանց վիզայի ազատ տեղաշարժի և արժանապատիվ ճամփորդության նպատակը»,- ամփոփել է նախարարը:
